GRABE ang mga presidential candidate kon makaduaw sa Sugbo. Maghilak ang semana nga di sila moari. Tungod na sa kadako sa botos nga ilang makuha gikan dinhi kon suportahan sila sa mga Sugboanon.
Kay niadtong 2016 elections, 1.4 million votes ang nakuha ni Presidente Rodrigo Duterte dinhi, labing dako sa tanang mga lalawigan sa nasod.
Nasayod ba kaha sila sa problema sa Sugbo sa ilang pagsuroy dinhi? Di baya kakabus ang dako kaayong problema sa Sugbo. Ang suliran sa trapiko sa Metro Cebu ug baha dugay nang giantos sa mga Sugboanon.
Panahon na nga ang mga presidential aspirant moklaro o moladlad sa ilang plano alang sa Sugbo kon sila mapili nga motimon sa nasod. Di lang kay general kaayo nga estorya kalabot sa mga problema nga nakahibawo na ang katawhan.
Sulod sa dugay na kaayong panahon, ang mga Sugboanon nag-antos aning problema sa trapiko nga gihatagan lang og temporaryong sulosyon sama sa pagtukod og mga flyover ug pagpalapad sa pipila ka mga karsada. Apan wa kini mapaigo sa nanaghan nga mga sakyanan sa dan dungan sa paglambo usab sa ekonomiya.
Sa administrasyong Duterte, daghan ang nahisgutang mga solusyon, apil na ang Bus Rapid Transit (BRT) system nga isagol sa monorail transit (MRT). Apan bisan usa na lang ka haligi, wa pay napabarog.
Gani, sukad nagsugod og hamok ang pandemic sa nasod, wa nay kisaw kabahin ning mga proyektuha.
Ang nasugdan lang nga maisip nga long term project mao ang expressway sa Sugbo nga nanukad sa Dakbayan sa Naga padung sa Danao. Nagsugod na ang unang phase niini sa Naga padung sa Minglanilla.
Mao ra ni ang makita. Bisan ang BRT nga giingong sugdan karong buwana, wa na may kisaw.
Busa, kon moari man gani ang mga presidentiable, mas maayong una nilang hisgutan kon unsay ilang mahimo alang sa Sugbo, labina sa nag-unang suliran, ang baha ug trapiko.