NADAKPAN pagbalik sa buy bust sa mga sakop sa City Intelligence Unit sa Cebu City Police Office si Alyas Negro ala 11:55 sa Lunes sa gabii, Disyembre 6, 2021 sa N. Bacalso Avenue, Kinasang-an Pardo, Dakbayan sa Sugbo.

Ang nasikop giila nga si Carl Garret Negro, 23, taga Paradise ll, Barangay Kinasang-an.

Si Negro nakuhaan og binulto nga gituohang shabu nga adunay gibug-aton nga 305 gramos nga mobalor og P2,074,000.

Matod ni Police Lieutenant Colonel Ike Arriola, hepe sa CIU, nga si Negro nadakpan na niadtong Abril 2020 sa kaso gihapon sa illegal nga drugas.

Apan pagka Marso 2021 nakagawas sa bilanggoan human naka benepisyo sa plea bargaining program.

Apan nibalik sa iyang illegal nga negosyo pagka Oktubre 2021 hinungdan nga gipaubos sa surveillance sulod sa duha ka semana.

Ang iyang area of operation mao ang Barangay Pardo ug silingang mga barangay diin maka baligya siya og 300 ngadto sa 500 gramos matag semana.

Usa ka alyas "Manoi" nga iyang higala sa sulod sa Cebu City Jail ang contact ni Negro sa supply niya sa illegal nga drugas. (AYB)