BRUTAL nga gipatay ang usa ka construction worker sa iya ra sab nga kauban sa trabaho, Lunes sa gabii, Disyembre 6, 2021, didto sa Gumamela Street, Phase I, Bacaca Road, Barangay 19-B, Davao City.
Sa kapaspas sa mga pulis sa San Pedro Police Station nga miresponde sa nahitaboan, nasikop ang suspek nga si Reginald James Maike Tabudlong, 29-anyos, construction worker ug residente sa Buhangin, ning dakbayan.
Daghang ginulgolan sa liog ang nahiagoman sa biktima nga si Allan Regalado Rallos, 39-anyos, construction worker ug residente sa Panacan, ning siyudad.
Sumala sa kapulisan sa San Pedro, hubog pa ang suspek nga ilang nasikop didto sa crime scene, samtang ang biktima daling gidala sa ospital sa miresponde nga BDRMC Ambulance sa Barangay 19-B.
Nakuha sa crime scene ang usa ka dako nga sundang ug puthaw nga maoy gigamit sa pagpatay sa suspek ngadto sa biktima.
Nasayran nga nag-inom ang duruha, dihang nagkainitay na, gibunalan og puthaw sa suspek ang biktima apan wala kini maigo, dali kining mipunit og sundang dayon gitigbas ngadto sa biktima.
Dihang nahagba na ang biktima, giayo’g gulgol sa suspek ang liog sa biktima hangtud nga namatay kini.
Kasong homicide karon ang giatubang sa suspek didto sa korte, samtang ang patay nga lawas sa biktima gipahiluna na sa iyang mga kabanay.