KIDAPAWAN CITY -- Gusto nang magbag-o sa kinabuhi ug magpuyo nga malinawon ang hinungdan sa pagsurender ngadto sa militar sa bomb expert sa Daulah Islamiyah Terrorist Group alas 2:00 sa hapon niadtong Lunes, Disyembre 6.

Giila ang bomb expert nga si alyas Tato, kinsa misurender ngadto sa puwersa sa 90th Infantry (Bigkis-Lahi) Battalion, Philippine Army, nga gipangulohan ni Lieutenant Colonel Rommel Mundala.

Gipresentar si alyas Tato ngadto kang 602nd Brigade Commander Colonel Jovencio Gonzales ug Vice Mayor Roger Ryan Taliño sa Camp Lucero, Carmen, North Cotabato.

Apil nga gisurender sa bomb expert ang M14 rifle, mga bala ug magazine.

Gikompirma sab ni 6th Infantry (Kampilan) Division Chief ug Joint Task Force Central Commander Major/General Juvymax Uy nga si alyas Tato gikonsiderang high-value target sa militar ug kapulisan human malambigit sa pagpamomba, murder, arson, kidnapping ug uban pa.

Misurender si alyas Tato human sa hiniusang panagsabot sa militar, kapulisan ug lokal nga panggamhanan sa Carmen. (Edgar E. Fuerzas)