TALIWALA sa posibleng pagsulod sa mas makatakod nga Omicron variant sa Covid-19 sa Pilipinas, ang lokal nga panggamhanan sa Davao City wa magtinguha nga ibalik og patuman ang "test before travel" policy alang sa mangabot nga mga pasahero sa eroplano.

Kini maoy gibutyag ni Mayor Sara Duterte-Carpio sa paghinabi kaniya sa 87.5 FM Davao City Disaster Radio niadtong Lunes, Disyembre 6.

"With regard to domestic travel, wala gihapon na siya nga requirement. Wala'y anything nga requirement," matud ni Duterte-Carpio.

Gisulti niya nga ang dakbayan magpatuman lang og balik sa "test" sa Francisco Bangoy International Airport (Davao International Airport) kung mabutang na ubos sa mga sumbanan nga ihatag sa Inter-Agency Task Force for the Management of Emerging Infectious Diseases (IATF).

Gipadaplin na sa lokal nga kagamhanan ang mandatory reverse transcription polymerase chain reaction (RT-PCR) test results ngadto sa tanang mga biyahero nga mosulod sa siyudad nga miepekto niadtong Nobyembre 16, 2021.

Kini human nga ang siyudad gipaubos sa Alert Level 2 tungod sa padayong pagtiurok sa mga kaso sa Covid-19.

Apan ang "test before travel" policy mahimo pa gihapong i-aplay sa tanang mga mangabot nga pasahero sa international flight sa Davao Airport, nga way gipihig kon asa nagagikan nga nasud, subay sa mando sa IATF.

Kini isip maoy tubag sa mitumaw nga Omicron variant, kon diin sumala sa mga eksperto sa panglawas, mas kusog nga Covid-19 virus itandi sa Delta variant.