Cebu Governor Gwendolyn Garcia miluwat og kamanduan sa pagpahunong sa pagpangubkob sa Barangay Lagtang, dakbayan sa Talisay samtang gi-umol pa sa maong siyudad ang traffic plan nga subayon sa mga trak de karga.
Kini base sa hangyo ni Talisay City Mayor Gerald Gullas ngadto sa gobernador.
“As regards to quarry, the authority of allowing them to operate comes from our PENRO at Capitol, not from the city government. But due to growing concerns, I met with Gov. Gwen to request PENRO to suspend quarry activities in Talisay City,” saysay ni Gullas.
Katuyoan sa traffic plan aron nga ma-regulate ug ma-monitor ang traffic flow sa mga trak de karga nga mosulod-gawas sa Talisay.
Subay niini, ni-umol si Gullas og komitiba nga maoy motutok sa pagplano ug pagpasar og lagda alang sa mga driver ug pribadong sektor nga mapatunhay sa pagmaneho sa kalsada.
Aron sab nga kalikayan ang nahitabong aksidente niadtong Disyembre 3, diin lima ang nakalas ug kapin sa 10 ang nangaangol sa dihang nagdumbol ang trak ug laing 12 pa ka mga sakyanan.
Base sa imbestigasyon sa CTTODA ug traffic police, gikatahong overspeeding ang hinungdan sa maong aksidente niadtong Biyernes.
“First of all, I’m saddened by what happened last Friday. I’m sad that people have died. I’m sad families lost loved ones that day. Again, my condolences to the bereaved families and my prayers to all still in the hospital,” mensahe ni Gullas.
Nagtinguha siya nga sa dugang lakang nga gihimo sa kagamhanan mas magiyahan ang mga motorista ug drivers nga malikay sa disgrasya.