Kapin sa P3.7 million nga balor sa illegal nga drugas nasakmit sa managlahing anti-drug operations sa Cebu City Police Office (CCPO) sa Lunes sa gabii, Disyembre 6, 2021.
Kasagaran sa mga dinakpan pulos ning-angkon nga gikan sa sulod sa Cebu City Jail ang ilang contact sa supply sa illegal nga drugas.
Gihingusgan karon sa kapulisan sa dakbayan sa Sugbo ang ilang kampanya batok sa illegal nga drugas nunot sa holiday season kanus-a taas ang demand.
Duha ka buy bust operations ang gilusad sa kapulisan.
Unang operation gilusad sa Waterfront Police Station sa Quezon Boulevard, Barangay San Roque, alas 10:30 sa gabii.
Kini niresulta sa pagkasikop sa managsuon nga silang John Carlo Cuizon, alyas “Kaloy” 33, ug manghod nga si Johnrey, alyas “Juan” 25, taga Sitio Guinabsan, Basak San Nicolas.
Nakuha gikan kanila ang kapin sa 200 gramos nga gituohang shabu nga mobalor ang tanan sa P1, 632,000.
Samtang pagka alas 11:55 sa gabii, nadakpan usab sa buy-bust operation sa mga sakop sa City Intelligence Unit ang usa ka ex-convict nga gipangulohan ni Police Lieutenant Colonel Ike Arriola sa N. Bacalso Avenue, Kinasang-an Pardo.
Ang nasikop giila nga si Carl Garret Negro, 23, taga Paradise II, Barangay Kinasang-an Pardo sa dakbayan sa Sugbo.
Si Negros nakuhaan og binulto sa gituohang shabu nga adunay gibug-aton nga 305 gramos nga mobalor sa kapin P2,074,000.
Matod ni Police Lieutenant Colonel Wilbert Parilla, deputy city director for operations sa CCPO, nga si Negro nadakpan na niadtong Abril 2020 sa kaso pagpamaligyag illegal nga drugas, apan pagka Marso 2021 nakagawas human naka benepisyo sa plea bargaining program.