Diputado: Tagnatagna una sa ituboy ni Gwen

Sa mga nag-tan-aw sa kalihokan sa Kapitolyo, makita dayon nila nga mainiton kaayo ang pagsugat ug pag-atiman sa mga bisita sa lalawigan, ilabi na gyod sa presidentiables.

Sama sa walay pili ang kainit sa paghangop sa mga bisita. Mibisita si Ping Lacson, gisundan ni Bongbong Marcos ug ni Isko Moreno, silang tanan giabi-abi og maayo ug gihatagan og tukmang pasidungog. Gipaapil pa sa mga kalihokan sa Probinsiya ug gidala sa lainlaing mga dapit.

Walay usa kanila nga makaingon nga wala dawata og maayo tungod kay mismo si Gobernador Gwen Garcia ug mga lider sa One Cebu nagpakita kanila atol sa ilang pagbisita.

Tungod niini, dili pa gyod matagna kon kinsa sa mga kandidato pagka-presidente ang hatagan og suporta sa One Cebu.

Buyno, dunay nagsulti kanako nga aduna nay napilian ang One Cebu apan dili pa mabutyag sa pagkakaron tungod kay sa sunod tuig na nila kini ipahibalo.

* * *

Kadaghanan sa katawhan karon padayon pa sa pagbantay kon kinsa gyod ang mogawas nga lider sa poll surveys sanglit dako kaayo kini og kalabotan sa kaugmaon sa usa ka kandidato.

Kadtong kandidato nga padayon ang pagsulbong sa survey kasagaran maoy gituhoan nga dako og tsansa nga modaog sa piniliay samtang kadtong padayon nga kulelat sa survey gituhoan sab nga gamay ra ang tsansa nga modaog.

Gani, mao pod kini ang kasagaran nga basehan sa ‘financiers’ kon asa sila mohatag og dako nga pundo para sa kampanya, adto gyod sa nag-una sa survey.

Mao kini hinungdan nga naghitak karon ang mga tarpaulin sa mga kandidato, bisan asa na lang kini ibutang sa ilang mga lumilihok, apil na ang mga lugar nga bawal unta butangan.

Gusto sa mga kandidato nga daghan ang makahibalo nga kandidato sila sa maong posisyon aron mosaka ang ilang ‘awareness level.’ Dako kini og ikatabang kon adunay poll survey nga pagahimuon tungod kay nailhan na man sila sa mga botante.

Anhi makita ang deperensiya sa kwartahan ug di kwartahan nga kandidato.

Kon kwartahan ang kandidato, nindot ang material unya daghan pa gyod kaayo ang maong propaganda. Kon di kwartahan o limitado lang ang kwarta sa kandidato, mailhan sab kini sa iyang propaganda materials.

Dinhi pa lang, makita na nimo nga kon magbugno sa politika ang kwartahan ug di kwartahan, dako gyod kaayo og puruhan nga modaog ang kwartahan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph