Dili pa ang campaign period alang sa eleksiyon sa Mayo 2022, apan ang mga kandidato sa nasudnong posisyon, labi na sa pagka presidente ug bise presidente, subsob ug nagbalikbalik sa Sugbo. Naningkamot nga makakuha og suporta sa mga lokal nga lider o partido ug ang pagpanguyab sa mga Sugbuanong botante.
Gipaabot nga mosamot kaalegre kon magsugod panahon sa kampanya. Nindot nga tan-awon ug dakong bintaha sa pagpamati sa plata-porma sa pagdumala sa gobiyerno sa matag kandidato kon sila palarang mapili. Gawas pa, mas maayo sa pagpatuyok lokal nga ekonomiya tungod sa ilang gasto.
Sa pikas bahin, makapabalaka kini tungod sa nagpadayong hulga sa coronavirus disease 2019 (Covid-19). Miluag na usab ang protocol. Wa kita masayod kon nagdala sila og virus. Gawas pa, ang mga politiko kanunay ubanan sa delegasyon ug ang uban kanila nag-una o advance party gikan sa kaulohan aron pag-andam sa lokal nga kalihokan.
Labaw nga makapabalaka, base sa ilang ulahing mga kalihokan sa Sugbo, sama sa walay pagpakabana sa minimum health standards sama sa social distancing, pagsul-ob og face mask ug uban pa. Nakakita ba kamo sa mga hulagway sa ilang kalihokan nga napatik sa mga mantalaan ug social media? Klaro sab sa mga video nga nakuha sa mobile phones.
Sa pagkakaron, kaso sa Covid-19 sa Sugbo nagkaubos hinungdan nga gibutang kita sa Alert Level 2 sama sa dakong bahin sa nasod. Dili kita mokompiyansa. Simbako kon mosaka og balik tungod sa panagtapok sa bagang duot sa katawhan sa kainit sa kampanya sa eleksiyon. Simbako, kitang tanan mapagan.
Bisan sa paspas nga programa sa pagbakuna, ang virus wala pa hingpit mapapas. Ug dili usab nato kalimtan ang hulga sa laing variant nga giingong mas mangtas.
Ang kabalaka negatibong pagbati (kon palabihan) apan positibong hinagiban batok sa kalibotanong hulga sa panglawas.