Nisaka ang gidaghanon sa mga barangay sa Cebu City nga walay transmisyon sa coronavirus disease 2019 (Covid-19) sa nakalabay nga 14 ka adlaw sa dakbayan sa Sugbo.

Gikan sa 55 niadtong Nobiyembre 25, nahimong 64 sa 80 ka barangays ang way pagpanakod sa Covid-19.

Kini ang gipahibawo ni north district City Councilor Joel Garganera, deputy chief implementer sa Emergency Operations Center (EOC) taliwa sa padayon nga pagtibugsok sa Covid-19 cases sa siyudad sa nakalabay nga 10 ka mga adlaw.

Si Garganera nagkanayon nga niadtong Disyembre 6, duha ra ka buok nagpositibo sa 281 ka mga individual nga gipaubos sa swab test kun 1.42% positivity rate.

Base sa record sa EOC, 42 na lang ka aktibong mga kaso sa Covid-19 ang padayon nga gipaubos sa quarantine.

Gipasabot ni Garganera nga nikunhod ang mga tawo nga gikuhaan og sample para pag-test sa Covid-19 sanglit diyutay nalang ang nagpositibo sa virus ug menos na usab ang ilang close contacts.

Gumikan sa padayon nga pagtibugsok sa active cases ug daily positivity rate, nag-anam na usab og us-os ang overall positivity rate sukad sa pag-abot sa Covid-19 dinhi sa Sugbo.

Ang EOC nakatala og 9.06 porsyento gikan sa kapin 10 porsyento nga overall positivity rate dihang nihugpa ang gidaghanon sa mga kaso sa first, second ug third surge, diin niabot na og 458,136 ka mga tawo ang nakuhaan og samples. Ang 41,509 kanila nagpositibo apan karon, 42 nalang ka mga tawo ang adunay Covid-19.

Apan bisan pa niini,giawhag ni Garganera ang mga tawo sa dili pagkumpyansa ug motuman gihapon sa mga basic health protocol nga gipatuman labi na nga adunay hulga sa Omicron variant nga gikan sa laing nasod.