DRAYBER ug pasahero sa usa ka traysikol ang dead on arrival sa usa ka tambalanan human malagpot sa gisakyang traysikol dihang nabanggaan sa usa ka bus Miyerkules, Disyembre 8, 2021.

Si Police Senior Master Sergeant Roy Cabahug sa Carmen Police Station nibutyag nga nahitabo ang insidente sa bangga alas 6:50 sa buntag sa nasudnong dalan sa Barangay Dauis Norte lungsod sa Carmen, Cebu.

Giila ni Cabahug ang namatay nga sila Daniel Enoy 52, nagpuyo sa Barangay Poblacion Danao ug Maria Elizabeth Genita, 73, taga Barangay Dauis Norte Carmen.

Samtang usa ka pasahero ang naangol nga nailhan nga si Thelma ang naka angkon ug mga samad-samad ss kalawasan nunot sa disgrasya.

Samtang ang drayber sa bus nga gipanag-iya sa Mitsumi nailhan nga si Ajie Petalmero, 43, taga Leyte.

Sa imbestigasyon sa Carmen Police Station nasayran nga ang traysikol paingon sa lungsod sa Carmen samtang ang Mitsumi bus paingon sa Dakbayan sa Danao.

Paghidangat na sa nahisgutang lugar mikalit og u-turn ang motorsiklo ug naigo gyud sa bus nga miresulta sa pagkalimbuwad ug pagkalagpot sa mga pasahero.

Ang duha nga nangamatay gidala pa sa balay tambalanan apan gideklara kini nga dead on arrival. (BBT,GPL)