NAGHUDYAKA ang Dabawenyos sa dihang gipahibawo sa lokal nga panggamhanan pinaagi sa official Facebook page sa City Government of Davao nga dunay maayong balita nga tanan makadawat og Pahalipay Christmas Package niadtong Martes.
Subay sa post magsugod ang pag-apud-apod sa package magsugod karong adlawa, Disyembre 8, 2021 hangtud na kini sa Enero 31, 2022.
Apan tungod lagi kay padayon pa ang hulga sa coronavirus disease 2019 (Covid-19), ang pagkuha niini kinahanglan nga ang indibiduwal mag-log in sa https://profiles.safe-davao.com/ aron nga malikayan ang panagtapok.
Tumong sab niini aron nga masayran kon asa kuhaon sa indibiduwal ang ilang package sama pananglitan sa kon kinsang suppliers ug branches nga magtakda nga motunol sa package sama sa mga department store nga naay branches sa Toril, Buhangin o kaha dinhi sa may Quezon Boulevard ning siyudad sa Davao.
Apan pila lang ka minutos, ang kalipay sa mga tawo nga makadawat og pahalipay sa gobyerno nahulipan og kasagmuyo ug kasubo kay di man maka-log in sa https://profiles.safe-davao.com/.
Nasayran nga ang website diay nga nagun-ob kay posibleng nag-inonahay ang mga tawo sa pag-log in kay kinsa may di maganyak kay pahalipay gud. Bisan kinsa man seguro rong panahona nagkinahanglan og ginagmay pinaskohan tungod lagi sa kalisud sa panahon human kita gihamok niining Covid-19. Ilabi na gyud nga daghan ning panahona nawad-an og trabaho ug panginabuhi.
Unta di dinhi matapos ang tinguha sa lokal nga panggamhanan sa pagtabang sa katawhan, ilabi na gyud sa mga kabus, samot na kay alang diay gyud kini sa tanan. Mas nindot ni karon kung molampos kay di lang pipila ka sektor sa katilingban ang makapahimulos, apan tanan na basta dunay DQR.
Manghinaut kita nga molampos kini ug di masayang ang paninguha sa dakbayan ug di sab mapakyas ang naglaum nang katawhan sa maong pahalipay.