DAGHANG mga mayor sa nasud ang misalmot sa League of Municipalities of the Philippines (LMP) 2021 Regional Planning sa SMX Premier, SM Lanang Davao City, niadtong Martes, Disyembre 7, 2021.

Mismong si Vice Presidentiable ug Davao City Mayor Sara Duterte ang usa sa mga bug-at nga partisipante nga mayor sa maong programa.

Gidasig ni Mayor Sara ang mga mayor diha sa mga butang sa panaghiusa aron makab-ot ang tiunay nga kalinaw sa komunidad.

Sa maong programa, wala nalikayan nga dunay mga nagpakita nga mga politiko nga kandidato karong 2022 elections sa taas nga posisyon.

Naa sa programa sa kanhi senador ug Presidential aspirant Ferdinand "Bongbong" Marcos, kanhi presidential spokesperson Harry Roque, ug si senatorial hopeful Herbert "Bistek" Bautista kinsa mayor sab karon sa Quezon City.

Sa usa ka press conference, gitin-aw sa mga mayor sa Lanao del Sur ug sa Maguindanao nga usa sa ilang mga kinahanglan mao ang mga proyekto nga ibubo sa mga politiko nga anaa sa mga tag-as nga posisyon sa nasud.

Sumala ni senatorial hopeful Herbert "Bistek" Bautista nga abli sa pagsagop sa suporta ni Mayor Sara kaniya nga sama niya andam mohimo og lakang sa mga plano alang sa mga lagyong munisipalidad sa mga lugar sama sa Lanao ug Maguindanao.

Daghang mga mayor sa Bangsamoro Autonomous Region in Muslim Mindanao (Barmm) ang misaad og suporta sama ngadto kang Bautista ug sa ubang mga politiko nga sa ilang tan-aw makatabang kanila.

Mga munisipyo sa Barmm maoy usa sa mga gihatagan og pagtagad sa Regional Planning sa LMP 2021.