DAVAO DEL NORTE -- Padayon pang gitambalan sulod sa balay tambalanan ang usa ka pulis human nadisgrasya sa gisakyang motorsiklo didto sa Purok Tipaz Road, Barangay Magugpo East, Tagum City sa ala 1:25 sa kaadlawon, Martes, Disyembre 7.

Biktima mao si Patrolman Dennis M. Siquera, 29, nga kasamtangang nakadestino sa Davao Norte Provincial Drug Enforcement Unit sa Tagum City.

Base sa inisyal nga pakisusi, nasayran nga ang biktima sakay sa gimanehong kolor pink nga Yamaha Mio motorcycle nga dunay plaka nga LA 84717, naglabigar gikan sa National Highway padung sa direksiyon sa dalang Briz.

Matud pa nga sa pag-agi sa biktima sa lubak-lubak nga dalan, nawad-a'g kontrol sa gimanehong motorsiklo ug aksidenteng nabalintong sa aspaltong dalan.

Ang biktima nakahiagom og seryusong samad sa lawas ug gitambalan sa mga personahe sa City Ambulance dayong gidala sa Tagum Doctor's Hospital alang sa dugang medikasyon.

Nasayran nga ang motor sa biktima naa gitanggong sa tugkaran sa Tagum City Police Station.