GIKANAYON sa lokal nga panggamhanan sa siyudad sa Davao nga pipila ka mga naggunit sa SafeDavao QR (DQR) Code posibleng nakasinati og sulirang teknikal sa pag-"log in" sa ilang mga accounts.
Ang dakbayan, pinaagi sa SafeDavao QR Facebook page kagahapon sa buntag, Miyerkules, Disyembre 8, nag-esplikar nga kini tungod sa nagpadayon nga "data importation."
"Tungod sa padayon nga data importation, adunay mahitabo nga posibleng paglangan sa pag-log in sa inyong DQR account pinaagi sa (through) website o (or) mobile app scanner," pagpasabot sa siyudad pinaagi sa advisory.
Nahitabo ang sulirang teknikal duha ka adlaw human si Mayor Sara Duterte-Carpio manghatag og Christmas "pahalipay" (pinaskohan) nga ipadala pinaagi sa SafeDavao QR (DQR) code sugod Disyembre 8.
Pipila ka oras human nagpahibawo ang siyudad, pipila ka mga DQR holders nagsulti sa ilang mga social media posts nga di sila makaabli sa profiles.safe-davao.com.
Ang uban makaabli sa website apan di maka-log in. Kadtong misulay sab og gamit sa app namatikdan nga sige lang og ka-kras.
Tungod niini, ang lokal nga panggamhanan nangayo og dispensa tungod sa kahasol.
Hinuon, nagpahimangno ang siyudad ngadto sa publiko nga di lang magdali sa pagkuha sa grocery packs kay ang mga DQR holders puwede pang makakuha niini hangtud sa Enero 31, 2022.
Gisulti ni Human Resource and Management Office (HRMO) Lemuel Ortonio sa dihang nahinabi sa 87.5 FM Davao City Disaster Radio nga ang "eligible grantees" sa "Pahalipay" mga Dabawenyos edad og 18 anyos pataas, di mag-agad kon nabakunahan ba o wala basta molupyo sa Davao ug dili empleyado sa lokal nga panggamhanan.
Tug-an niya nga ang matag grocery pack kantidad og P400 nga dunay sulod nga bugas, delata ug spaghetti noodles.
"Ang himuon lang is to log-in sa DQR para makita asa i-claim ang supplies," pagklaro ni Ortonio.
Gitin-aw ni Ortonio nga mga empleyado sa siyudad di makadawat niini tungod kay duna silay kaugalingong pahalipay gikan sa gobyerno.
Ang "Pahalipay" program nakig-alayon sa nagkadaiyang grocery shops nga nanghatag sa suplay alang sa mga gasa.
Hangyo ni Ortonio sa Dabawenyos nga magbaton og pasensiya sa pagkuha sa ilang mga grocery kay palugwayan pa nila ang ihap sa mga adlaw sa pagdawat niini kay ila lang nga gitunga ang ihap sa mga tawo aron nga malikayan ang panagtapok.
Dugang gipaklaro nga bisan tuod kon ang "Pahalipay" alang sa general public, apan matud ni Ortonio nga ubang mga grupo mga regular beneficiaries na sama sa "persons living with HIV-Aids, indigents, Barangay Health Nutrition Scholars" ug mahimong makadawat pa og vouchers nga dunay mas taas nga kantidad.