GUMIKAN sa ginagmayng kakuli-an, giuswag ang grand reunion ug Christmas party sa kanhi basketball players sa Cebu Amateur Athletic Association (CAAA).
Kini maoy gipahibawo ni Vice-Mayor Jingjing Chiong sa siyudad sa Naga.
Matod ni Chiong nga imbis sa Disyembre 18, 2021, adlawng Sabado, ipahigayon ang maong kalihukan, iuswag kini ngadto Disyembre 19, 2021. Ipahigayon gihapon kini sa Chiong compound sa nahisgutang siyudad.
Gipasabot ni Chiong nga iya na usab gipahibawo ang presidente sa CAAA Basketball Alumni Association (CBAA) nga si Jun Montalbo kalabot sa maong pagkauswag.
Si Montalbo, kinsa kanhi sakop sa Cebu Gems sa nabungkag nga Metropolitan Basketball Association (MBA), miingon nga kining maong kalihukan makapahugot sa panaghiusa sa kanhi CAAA players taliwala ning pandemya.
Gawas sa pagkauswag, way laing kausaban sa mga programa sa maong kalihukan.
Aron paghatag og kasayon sa mga motambong, adunay libreng sakay nga maoy mokuha ug mohatod paingon sa venue. Kini anha magpaabot sa MalacaƱang sa Sugbo (sa likod nga bahin sa Plaza Independencia) nga molarga sa untop alas 11:00 sa udto.
Ang Q and A games, sing-along contest, videoke, live band maoy pipila ka mga modayan-dayan sa maong party.
Pipila ka mga kanhi PBA players sama nila ni Boy Cabahug, Bonel Balingit, Al Solis, Max Delantes ug Montoy Singson, Dondon Hontiveros, Roger Yap, Calvin Tuadles, Mark Anthony Tallo ug uban pa ang gipaabot nga motambong ning maong event kansang tumong ug tuyo mao ang pagpakighimamat sa kanhiayng manag-uban sa team ug pagpalig-on sa kasuod sa matag usa.