ANIA karon si Treb sa balay nga bag-o lang niyang napalit. Nahimutang kini sa usa ka subdibisyon sa dakbayan sa Sugbo. May duha ka andana ang balay: sa itaas naay tulo ka lawak-higdaanan; sa ubos naa ang hamugaway nga sala, komedor, kusina ug banyo. Ang tag-iya usa ka doktor nga milalin sa Amerika duha na ka tuig ang milabay, uban sa iyang asawa ug anak nga nars aron adto na didto manimuyo. Ug karong semanaha pa siya mitakli kuyog sa iyang mama nga biyuda, si Merlina. Si Treb mao pay pagtungtong sa edad nga trayenta sa miaging buwan.
Abogado si Trebor Abellana ug usa sa mga partner sa Abellana Caballero Rosal & Associates nga daghag mga kliyente. Mao pay iyang pagbangon ning buntaga. Misulod siya sa ikatulong lawak-higdaanan nga kasikbit sa iyaha, kay si Mama niya mao man ang migamit sa unang lawak. Gipaliraw niya ang iyang mga mata sulod sa lawak ug nasangit ang iyang panan-aw sa usa ka hulagway nga nagbitay sa bungbong. Gitutokan niya ang busto nga hulagway sa usa ka matahom nga babaye nga nagsul-ob og kimonang Balintawak nga bulok rosas. Ang hulagway sa babaye nagpahiyom, morag mitimbaya sa iyang pagsulod.
“Treb, naog na! Mamahaw na ta!” nabati ni Treb ang sangpit ni Merlina gikan sa kusina.
“Oo, Ma, moanha na ko!” tubag ni Treb.
Nianang pagka gabii wa dayon mahikatulog si Treb. Nahanduraw niya ang hulagway sa nagpahiyom nga babaye sa kuwadro. Mibangon siya ug misulod sa ikatulong lawak. Gipasiga niya ang suga ug gitutokan pag-ayo ang hulagway. Iyang gitangtang ug gilimpiyohan sa dala niyang labakara. Sa misunod nga mga gabii mao kini ang iyang gibuhat una matulog: mosulod siya sa lawak ug motutok sa hulagway hangtod nga mibati siyag paghigugma sa babaye nga diha sa kuwadro. May mga higayon nga iyang hagkan ang hulagway. Mora siyag buang nga moingon, “I love you, whoever you are!” Ug mihukom siya nga pangitaon niya ang babaye ug maoy iyang dad-on sa altar sa kaminyuon. Apan asa niya kini pangitaa? Buhi pa kaha kini?
USA ka hapon didto sa ilang bupete naghimo si Treb og ‘legal brief’bahin sa usa ka kaso nga siya ang midaog. Mitingog ang intercom sa iyang lamesa.
“Sir, niay babaye nga nangita nimo, ako pasudlon sa imo office?” matod ni Melai, iyang sekretarya. “Okay, let her come in,” tubag ni Treb.
Naabli ang pultahan sa opisina ni Treb ug mibantang sa panan-aw niya ang bayhon sa usa ka maanyag nga babaye. Nagpahiyom kini kaniya. Kusog nga mibutokbutok ang iyang dughan. Ang babaye kaamgid gayud sa hulagway sa bungbong didto sa ikatulong lawak. Nagsul-ob kinig T-shirt nga kolor rosas ug jeans nga maong ug nagsaliay og itom nga shoulder bag.
“Good afternoon, Atty. Abellana! I’m Ellen Pasaylo. Nars ko sa US ug nagbalik-bayan. I’m here to make a request kay ikaw man ang nakapalit sa among balay sumala ni Mr. Tecson, ang real estate broker,” matod sa babaye nga milingkod sa silya atubangan sa lamesa ni Treb. “Bahin sa unsa man ang imong request, Mrs. Pasaylo?” ni Treb nga mibawos pagpahiyom. “Hehehe! ‘Miss’ pa ko, Attorney,” ni Ellen nga miagik-ik. “It’s about the picture frame of my Lola when she was young in my room. Mama would like to have it back with us.”
“Wa ni nako hilabti. Tua pa ni nagbitay sa bungbong,” ni Treb. “Ug nahibawo ka ba, Miss Pasaylo, nga kaamgid ka kaayo sa imong Lola?”
“Yes, I’m her splitting image,” ni Ellen. “Nus-a nako kuhaon ang hulagway ni Lola?”
“Karon. Let’s go to the house!” ni Treb nga natugob sa kalipay ang dughan kay may binuhat diay nga buhi ug nagbaton og katahom sama sa hulagway sa babaye sa bungbong. Dako ang iyang paglaom nga ikasuod niya kini ug mahimong hinigugma.
Mibalik sa Amerika si Ellen nga nagdala sa hulagway sa iyang Lola ug ang numero sa selpon ni Treb. Kanunay sila nag-chat sa Facebook. Sa ‘Skype’ gidaygan ni Treb sa iyang gugma si Ellen nga wa magdumili pagdawat niini kay nahigugma man sab siya kang Treb. Ug paglabay sa tulo ka bulan, mibiyahe si Treb paingon sa Amerika alang sa ilang kasal ni Ellen. (KATAPUSAN)