TULO ka mga establisemento nga nasakpan sa kapulisan nga nakalapas sa lagda sa Kagamhanan sa Siyudad sa Sugbo labot sa curfew gipatubag na sa Business Permit and Licensing Office (BPLO) samtang ang Cebu City Police Office (CCPO) padayon nga mosusi sa mga imnanan matag gabii.

Human isyuhi og show cause order, ilang gihuwat kon ang tulo ka mga establisemento nga nasakpan nga nakalapas sa lagda ni Cebu City Mayor Michael Rama labot sa curfew, suspensohon ba ang ilang mga business permit.

Matod ni Police Lieutenant Colonel Wilbert Parilla, deputy city director for operations sa CCPO), nga klaro kaayo ang kalapasan sa tulo ka mga imnanan sanglit lapas na sa alas 12 sa tungang gabii padayon sila nga namaligyag ilimnon nga maka hubog ngadto sa ilang mga kustomer.

Wa niya nganli ang mga establisemento ug kon asa kini nahimutang.

Pasabot ni Parilla ngadto sa mga management nga kon ang curfew magsugod sa alas 12 sa tungang gabii, dili mahimo nga alas 12 usab nila pagawason ang ilang mga kustomer tungod kay mamahimong madakpan ra usab sa gawas.

“Klaro naman gud to kaayo kay migikan ta diri (CCPO) alas 12 pasado na. So, that is a clear violation. Kay in our guidelines, it should be 12 o’clock, dili pwede nga 12 o’clock ang atoang curfew 12 o’clock sad sila manirado. Dapat before 12 o’clock, wala nay tawo,” pasabot ni Parilla.

Atol sa gilusad nga Oplan Bulabog, usa sa mga tag-iya sa imnanan, nibutyag sa Facebook page sa CCPO nga nag-live niadtong tungora nga nakig-estorya na siya kang Parilla sa wala pa hingpit gipatuman ang bag-ong lagda nga giluwatan ni Rama nga ang pulis na mismo ang mamadlong nga mamauli na ang mga tawo tungod kay hapit na ang curfew.

Apan matod ni Parilla nga dili kini mahimo tungod kay sa kasabutan atol sa pag kuhag special permit sa mga imnanan ngadto sa Emergency Operations Center (EOC), sila ang responsable nga mopahibawo sa ilang mga customer labot sa curfew. Dugang lang kini sa trabaho sa pulis.

Gipasabot usab ni Parilla nga nasayod na ang mga Sugboanon nga adunay gipatuman nga curfew ang dakbayan.

“Sila maoy responsabli dapat sa ilahang customers. Dili kay ila pang ihatag sa pulis aron maoy mobadlong,” dugang ni Parilla.

Sa gilusad nga operation bisan nga naabot na ang alas 2 sa kaadlawon, aduna pay mga imnanan nga wala pa manira ug aduna pay mga kustomer nga nanag inom sa sulod.