Seguridad sa Misa de Gallo sa Carbon hugtan sa kapulisan

SEGURIDAD sa Carbon Public Market hingusgan sa kapulisan atol sa pagsugod sa Misa de Gallo nga ilusad sa mga manindahay sugod sa kaadlawon sa Disyembre 16, Huwebes, hangtod sa Disyembre 24, Biyernes, sa gabii.

Si Police Major Kenneth Albotra, hepe sa Carbon Police Station, niingon nga nagbutang sila og usa ka patrol sa kapulisan ug usa ka team nga maoy mopatuman sa minimum health protocols.

Ilusad ang Misa de Gallo sa dalan MC Briones atubangan sa usa ka bakeshop sa Unit 3 sa Carbon public market nga gituohan nga dugokon sa mga tawo labi na sa mga manindahay og utanon sa merkado.

Gawas sa mga uniformed personnel nga ipakatap, adunay mga force multiplier nga moabag sa kapulisan sa pagpatunhay sa kahusay ug kalinaw sa Carbon market.

“Mag deploy tag mga PNP personnel para ma maintain nato ang peace and order security diha sa area ug ato pud i-deploy ang kining mga force multiplier para ma maintain nato ang minimum healt and safety protocols while gi conduct ang mga masses aning schedule. So, mag butang tag usa ka mobile patrol ug mga personnel nga mobantay,” matod ni Albotra.

Dugang ni Albotra nga ilang gipaniguro nga matuman ang social distancing sa mga manambong hinungdan nga magbutang silag bangko aron basehan sa distansya sa mga tawo sa matag usa ug malikayan ang tinakdanay sa Covid-19.

Tugotan hinuon nila nga motindog lang ang mga tawo sa kilid ubos sa kondisyon nga dili magsikitsikit.

“Kana ato gyud nang isiguro ang social distancing. In fact, ang mga bangko is naa naman naka in place as to the distancing. So, kini lang nga naa sa kilid-kilid. So, ato lang gyud i-emphasize ang social distancing kay wala man koy nakita nga limit sa mga tawo. Hinuon mga vendors ra man ang usual nga mo attend ani nga mga (kalihukan),” dugang ni Albotra.

Makig-alayon pa sila sa buhatan sa market administrator sa Carbon kon aduna ba silay ipatuman nga one entrance, one exit policy aron malikayan nga magsugatay ang mga tawo.

Giklaro hinuon ni Albotra nga matag kaadlawon usa lang kini ka misa nga magsugod sa alas 4 hangtod alas 6 sa buntag .

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph