BISE mayor sa lungsod sa Bien Unido, Bohol naapil sa 23 ka mga tawo nga nasikop dihang gironda sa kapulisan ang usa ka tigbakay sa alas 11 sa buntag sa Dominggo, Disyembre 5, sa Barangay Mandawa, Bien Unido, Bohol.

Lakip usab sa nasikop ang usa ka barangay kapitan ug barangay konsehal.

Ang nasikop nila ni Police Major John Karren Escover, pangu sa Provincial Intelligence Unit sa Bohol Police Provincial Office (BPPO), nga mga elected official giilang sila si Bien Unido Vice Mayor Ramon Arcenal, 56, taga Brgy. Estrella; Mandawa Brgy. Captain Patrocenio Boniel, 54; ug Mandawa brgy. Konsehal Jovey Boniel, 38.

Si Kapitan Boniel nadakpan na usab sa kapulisan sa sulod sa tigkabayan niadtong Nobiyembre 30, 2021.

Laing 20 nga nasikop uban kanila naglakip sa usa ka retired Navy serviceman.

Sila si Escober nakakuha og duha ka mga manok igtatari nga pulos samdan ug P2,000 nga kwarta sa nagkalainlaing denominasyon isip mga ebidensya.

Si Escober nga nahinabi sa Superbalita Cebu nagkanayon nga naghinangat ang fiesta sa lugar.

Nakadawat sila og impormasyon nga dunay daghang mga tawo nagtigbakay sa dapit hinungdan ilang gironda.

Nasurprisa sab sila kay usa sa ilang nadakpan mao si Arcenal ug ang duha ka barangay officials.