GITUGOTAN na ni Naga City Mayor Kristine Chiong nga mosuroy ang mga bisita ug residente sa Boardwalk ug Naga Park sa Dakbayan sa Naga basta mosunod lang sa lagda paglikay sa pagtakboy sa Covid-19.

Kini subay sa uwahing panahom ni Chiong sa hingpit nga pagbukas na sa maong mga attraction sa siyudad.

Matod ni Chiong nga mahimo na nga mosuroy, bisan ang magpamilya, ilabi ning panahon sa Pasko aron mahupay usab ang mga kabalaka sa mga residente ning nagpadayong pandemya sa nasud.

Subay niini, gipahinumdoman usab ni Chiong ang mga moduaw sa lugar nga mag-obserbar sa health protocol sama sa pagsul-ob og facemask, paglikay sa tapok-tapok, pag dutdot sa mga dili kaila o gawas na sa grupo sa pamilya ingon man batasanon ang pag disinfect sa mga kamot.

“Let us celebrate the coming of Jesus while at the same time not letting our guard down. Each one of us needs to be responsible and take the necessary precaution for the health and well-being of our parents, children, relatives and friends,” matod ni Chiong sa Disyembre 7.

Alang sa mga moduaw sa Sabado, Dominggo ug holidays, mahimo kini matag alas 5:00 sa hapon hangtod sa alas 9:00 gabii.

Aron dili maapektohan ang kahimtang sa trapiko sa kadalanan sa siyudad, sa mga sakyanan nga gikan sa Minglanilla ug mosulod sa Naga Park ug Boardwalk, gikinahanglan niining mo left turn sa Rizal St.

Samtang kadtong gikan sa San Fernando ug Toledo, kinahanglang mo right turn sa Sayson St.

Kon nagagikan na usab sa Naga Park, kinahanglan anha kini moagi sa U-Turn slot duol sa usa ka Korean shop.

Nanghinaot si Chiong nga hiusahon sa mga residente sa siyudad ang pag-ampo ug pagpabakuna alang sa hingpit nga kaayohan sa nasud ning nasinati nga pandemya.

Sa Disyembre 6, gipahibaw ni Chiong nga niabot na sa 70 porsyento ang nabakunahan sa unang dose alang sa mga eligible nga 12-anyos pataas. Samtang anaa sa 49 porsyento ang kompleto na nga nabakunahan kontra Covid-19.

Nanawagan ang mayor sa mga residente ug batan-on nga wala pa makapabakuna nga modangop na sa vaccination site sa siyudad aron ma protehian batok sa grabeng epekto sa covid-19.

“Pangayuon nato ang grasya sa Balaang Batang Hesus, nga panalanginan ang atong tinguha ug paglaum nga magmadaugon kita batok sa pandemiya, pinaagi sa pag-amping kanunay ug pagpabakuna,”matod ni Chiong.