USA ka massive vaccination ang gilusad sa Cebu City Government sugod karong adlawa, Disyembre 9, sa tinguha nga makab-ot ang herd immunity batok sa Covid-19 sa dili motapos ning tuiga.
Si Dr. Jeffrey Ibones, pangulo sa Cebu City Health Department (CCHD) nagkanayon nga 93 porsiyento na gikan sa 719,000 nga target sa Cebu City ang bakunahan aron makuha sa dakbayan ang gitawag og herd immunity.
Base sa data sa CCHD, niabot na og 674,667 ang nabakunahan sa vaccination rollout sa Dakbayan, diin 448,064 kanila ang fully vaccinated samtang 588,686 ang first dose gikan sa 948,896 ka mga tawo nga nagparehistro para magpabakuna batok sa Covid-19.
Ang pangulo sa CCHD nagkanayon nga nag-anam og kadaghan ang nagpabakuna sanglit kagahapon, ang vaccination site sa Cebu Institute of Technology University (CIT-U) nakabakuna og 1,013 ka mga mga minor nga nag-edad og 12 hangtod 17 anyos, diin sa kinatibuk-an nakabakuna sila og kapin o kulang 8,000 ka mga individual para sa first ug second dose sa tanang regular ug pop-up vaccination sites sa dakbayan.
Karong adlawa, Disyembre 9, ang Kagamhanan sa Dakbayan moabli sa ilang 22 ka pop-up vaccination nga nahimutang sa Barangay Hipodromo, Busay, Kalunasan, Kamputhaw, Lahug, Luz, Bulacao, Inayawan, Mambaling, Quiot, Tejero, San Nicolas Proper, Calamba, Duljo, Guadalupe, labangon, Punta, Tisa, Mabolo, Talamban, Apas ug Iconique sa dan Colon.
Sa Disyembre 10, ang pop-up vaccination adto sa Kalunasan, Lahug, Luz, Bulacao, Inayawan, Mambaling, Poblacion Pardo, Tinago, San Nicolas Proper, Calamba, Duljo, Guadalupe, Labangon, Punta, Tisa, Mabolo, Talamban ug Apas.
Sa Disyembre 11,sa barangay Kalunasan, Kamputhaw, Lahug, Luz, Bulacao, Inayawan, Mambaling, Poblacion Pardo, Suba, Guadalupe, Labangon, Tisa, Mabolo, Talamban ug Bacayan mahimutang ang pop-up vaccinations.
Sama sa naandan, abli gihapon sa kanunay ang regular vaccination sites nga nahimutang sa Ayala, UC Alcantara, SWU (minors), Robinson Cybergate (minors), Robinsons Galleria, SM Seaside City ug SM City Cebu.
Si Ibones nagkanayon nga giablihan ang maong mga pop-up site kay maoy sugo ni Mayor Michael Rama aron madasig ang mga senior citizen ug persons with disability nga magpabakuna sanglit sila ang priority human usab nianunsyo ang mayor nga priority sa financial assistance ang fully vaccinated ug isunod nag first dose. Ang cash card gipasuspenso usab sa mayor.
Base sa data, kapin pa sa 50,000 gikan sa dul-an 100,000 ka mga senior citizens sa Cebu City ang wala makapabakuna ug gipadayag sa pangulo sa CHD nga dili maka-upgrade sa level 1 ang dakbayan kon dili makaabot og 50% sa mga edaran ang mabakunahan.
Sa Disyembre 15,16 ug 17 nga laing hugna sa three day national vaccination day , gipadayag ni Ibones nga magtarget sila og 7,000 ka mga first dose matag adlaw nga maoy numero nga gihatag sa DOH para bakunahan.
Positibo si Ibones nga sa maong paagi, makab-ot sa siyudad ang herd immunity ug posible pa kining molapas inig katapos sa buwan sa Disyembre 2021.