NAPIANG ang walang abaga sa inahan sa suspek nga nanigbas sa tulo ka managsuong menor human giataki sa iyaan sa mga bata sa Purok 2, Barangay Tabon, lungsod sa Dalaguete kagahapon, Disyembre 8, sa alas 11:00 sa buntag.

Si Nemesia Guevara Quijano, 56, minyo ug mag-uuma, na-dislocate ang bukog sa walang abaga dihang gibugno.

Samtang si Pafeciana Ponce Comedido, 46, minyo, mag-uuma sa nahisgutang lugar gipusasan sa kapulisan.

Si Police Corporal Jem Vincent Pacaldo, imbestigador sa Dalaguete Police Station, nagkanayon nga si Quijano nipauli sa ilang panimalay aron pagkuha sa mga sapot sa iyang anak nga si Junjun , kinsa naa pa usab sa tambalanan sa lungsod human nagdunggab sa kaugalingon human niya pangtigbasa ang tulo ka mga bata nga iyang mga silingan.

Sa pag-abot ni Nemesia, nagtapok na ang mga kabanay sa mga biktima nga nagpuyo sab tupad sa ilang balay.

Nahitabo ang komusyon, nagkakumprontasi sila kabahin sa nahitabo nga gipangtigbas sa anak ni Nemesia ang tulo ka mga bata.

Nisulod sa panimalay si Nemesia ug nagdali og panghipos sa mga sapot nga dalhon unta niya sa tambalanan. Si Comedido, mibiya sa dapit.

Si Nemesia nagdali sa pagbalik paingon sa ospital, apan nakugang siya ni Comedido sa agianan ug gidiretso sa pagbugno.

Gikabay-an ug gidabudabuhan siya hangtod nga natumba ug na dislocate ang wala nga abaga.

Ang biktima nga gamay nga pagkababaye nakamaniho pagdagan paingon sa karsada ug nakasakay sa habalhabal, milahos sa police station.

Ang mga pulis nga nirespondi sa lugar nisikop kangComedido.

Si Nemesia kinsa nakapakurasyon sa iyang mga samad miduso sa iyang reklamo pagpasakag kaso.

“Kon wala pako makadagan, nakasakay sa habalhabal, mas grabi pa ang kadaot sa akong kalawasan,” sumala ni Pacaldo nga nikutlo sa gisulti ni Nemesia kaniya.

Ang suspek nangayog pasaylo pero wala dawata sa biktima hinungdan nga gibalhog sa detention cell.

Ang tulo ka managsuong minor naa pa sa tambalanan sa dakbayan sa Sugbo, kritikal ang 14 anyos nga si Juan, kinsa dakog kaayog samad tinigbasan sa ulo.