Local disaster offices sa Lalawigan sa Sugbo gialerto; dapit sa Carmen naigo sa storm surge

GIMANDOAN sa Provincial Disaster Risk Reduction and Management Office (PDRRMO) ang tanan nga mga local disaster offices nga monitoron ang kalungsoran ug dakbayan, labina sa amihanang Sugbo, subay sa nasinati nga di maayong kahimtang sa panahon tungod sa hanging Amihan.

Gipahibaw ni Wilson Ramos, Interim officer sa PDRRMO, nga nakatala ang probinsya og usa ka insidente sa storm surge nga nasinati sa barangay Luyang, lungsod sa Carmen diin usa ka balay nga gipanag-iya ni Lilia Remoto naapektuhan.

Gawas niini, gikataho usab ang pagsuspenso sa byahe sa pipila ka mga publikong sakyanang pangdagat sa Dakbayan sa Danao, lungsod sa Medellin, ug lungsod sa San Remigio tungod sa kusog nga hangin ug dagkong mga bawod.

“Tungod sa weather karon naay gitawag nato nga scattered thunderstorms nga mag-uwan didto sa south or sa north...keep monitoring lang sa mga sitwasyon unya naa sa ilang discretion ang pag tan-aw ug paghatag og information sad sa mga local chief executives alang sa mga lakang nga himuon,”matod ni Ramos sa Disyembre 9, 2021.

Matod ni Ramos nga subay sa monitoring gipanglantawan nga magpadayon pa ang pag-uwan, diin may posibilidad nga ang kasamtangang low pressure area (LPA) mahimong bagyo ug gipaabot nga mo landfall sa sunod semana.

Hinuon gipasabot niya nga possible pa usab kining matunaw sa mo sunod pang mga adlaw.

Apan tungod kay nasinati ang hanging Amihan, gi-mandoan ang tanan nga mga sakop sa LDRRMO sa pagsusi sa mga lugar nga risgo sa pagbaha, landslide o pagdahili sa yuta ug mohimo og early warning o preventive measures aron malikayan ang disgrasya.

Gi-awhag usab ang mga residente sa probinsya nga mobakwit o manawag sa mga disaster offices kon makita nga dili na maayo ang kahimtang sa nahimutangan o magrisgo sa kinabuhi.

“As much as possible nga kon makita nila nga delikado na ilang lugar especially katong naa sa landslide prone area ug coastal bakwit na gyud sila,”matod ni Ramos. (ANV)