GATE crasher namusil kay gipaundang sa pag-inom atol sa birthday party alas 11:15 sa gabii sa Miyerkules, Disyembre 8, sa Almendras St., Purok Batirol, Brgy. Suba, dakbayan sa Danao, apan ang bala nga niigo sa silingan wa malubong.
Si Noel Garbo Hermoso, 47, buwag sa asawa, habalhabal driver, gidakop sa kapulisan human pusila si Emmanuel Montesclaros, 48, minyo, silingan.
Si Police Master Sgt. Raymond Bacordo, imbestigador sa Danao Police Station nga nahinabi sa Superbalita Cebu, nagkanayon nga birthday sa pag-umangkon ni Montesclaros.
Si Hermoso nga wa imbetara kalit nga niapil ug gipakaon nila ingon man gitagayan.
Sa lawom nang gabii, nanguli na ang mga bisita ug nangahubog na sila.
Si Montesclaros nibadlong kang Hermoso aron moundang na sa pag-inom kay hubog ug ihatod siya sa pagpauli.
Walay daghang langas, inay mopatuo, si Hermoso nikalit sa pagbunot sa iyang giloklok nga Black Widow .22 caliber revolver ug gipusil si Montesclaros sa dughan.
Daling gidala si Montesclaros sa tambalanan samtang si Hermoso gidakop sa kapulisan.
“Wala gyud daw ni nila imbetara ang (suspek) mi gate crash lang. Unya na-ikog man sila, gihatagag pagkaon, ilimnom, pagkahubog namusil,” dugang ni Bacordo.
Si Montesclaros gihulagway nga dunay anting-anting kay wala kadulot ang bala.
“Nasamad ang dughan unya wala maka penetrate ang bala. Namapha lang siya. Paghumag pusil, miadto sa tambalanan,” sumala ni Bacordo.
Nabawi sa kapulisan ang usa ka Black Widow .22 caliber revolver, tulo ka mga bala ug usa ka kabhang.
Si Hermoso gikatahong naburyong kay gibiyaan sa iyang pamilya.
GIPATAY
Samtang namatay ang usa ka ulitawo kay gipusil samtang nagpahayahay sa lantay alas 5:40 sa hapon sa Miyerkules sa Sitio Mangahan, Brgy. Sabang, Danao City.
Si Amado Matugas, 33, ulitawo, namatay sa mga samad pinusilan sa kalawasan ug ulo.
Wala pa mailhi sa kapulisan ang duha ka mga gunman nga nagsakay sa kolor red/black nga motorsiklo nga walay plaka.
Si Bacordo nagkanayon nga posibling naalaan si Matugas.
Ang mga ginikanan, kabanay ug barkada ningbutyag nga buotan si Matugas.