SI kanhi city administrator Floro Casas Jr., maoy bag-ong chairman sa Partido Panaghiusa, kanhi local political party sa inilang local politicians sama ni anhing Inday Nita Cortes Daluz ug Tony Cuenco. Kini gi-revived ni Metro Cebu Water District (MCWD) chairman of the board of directors, Joey Daluz III. Si Daluz nagpabilin gihapon nga party president.
Namulitika na si Casas human siya mo-resigned sa City Hall human namatay si Mayor Edgardo Labella. Siguro napugos siya pag-resigned human gimando ni Mayor Mike Rama nga ang tanang coterminous ni Labella di na mo-report.
Matod sa akong kasaligang tinubdan nga ang tanang loyal supporters ni Labella, labi pang iyang mga kauban sa law office nga gipangtudlo isip department heads ug pamilya sa mitaliwan nga mayor, adto mosuporta kang mayoral aspirant Konsehal Dave Tumulak inay kang Rama. Nagpadayon ang ilang mga tigum aron kini maplantsa.
Matod sa tinubdan nga si Mrs. Joy Labella, asawa sa namatay nga mayor, ug anak nga si Eugene, adto mosuporta ni Tumulak. Ang ilang giplantsa mao ang baruganan ni Jaypee, laing anak ni Labella. Si Jaypee milansar pagka konsehal sa north district ubos sa Barug Party ni Rama. Maipit si Jaypee sa desisyon sa iyang inahan ug igsuon.
Laing isyo nga gikonsiderar sa grupo mao ang desisyon ni Presidential Assistant for the Visayas Sec. Mike Dino, kinsa komitido na sa panagpares nila ni Rama ug Raymond Garcia. Maguba ang kamada ug makabentaha si Margot Osmeña kon mabahin ang suporta tali nila ni Rama ug Tumulak.
Nidugang ang tinubdan nga nahiubos kaayo sila si Casas kang Rama. Kini gumikan kay lahi ang gipamahayag sa publiko ug gipanghimo. Ilang gitawag si Rama og plastik ug trayidor. Sa iyang public pronouncement, gibalik-balik ni Rama nga ‘dili tay-ugon ang City Hall.’ Apan wala pa gani malubong si Labella, iya gipanghulipan ang mga tinudlo. Maorag hakog sa gahom.
SIGE’G MEETING
Giingong nangreklamo ang pipila ka department heads nga magsige og patawag og meeting si Rama sa buntag, hapon ug pagka-ugma. Usik sa oras. Maayo kon ang hisgutan ang ilang programa apan iya man nga life story nga namaligya siyag newspaper, itlog ug grapes. Aw, maayo gani wala sila kantahi.