DAVAO DE ORO -- Nahanaw na ang kahadlok sa pipila ka mga tawo nga kaniadto dunay pagduha-duha nga magpabakuna batok sa coronavirus disease 2019 (Covid-19) gumikan sa nagkadaiyang rason nga gidugangan sa mga sayop nga impormasyon nga napatik sa social media.

Sa gipahigayong pagpamakuna sa lokal nga panggamhanan sa Nabunturan niadtong Disyembre 6, dili matukib ang gidaghanon sa mga tawo nga buot magpabakuna kon diin ang kataas sa linya miabot gikan sa munisipyo sa lungsod padulong sa vaccination site.

Mga nagpabakuna gilangkuban sa nagkadaiyang sektor sa lungsod, lakip na niini ang mga tiguwang o senior citizens ug mga trabahante kon diin human sila nabakunahan, gilibre sab sila og Chicken Lomi ug tag-duha ka kilong bugas.

Samtang padayon pa ang pagpahigayon og bakuna sa mga menor de edad gikan 12 hangtud 17 anyos.

Sa pikas bahin, sa lungsod sa Compostela, dili sab matukib ang gidaghanon sa mga lungsuranon sa gipahigayong roll–out vaccination sulod sa tulo ka adlaw.

Si Jan-Jan Bernadaz, 28, taga Brgy. Poblacion nagsulti nga alas 4:00 sa kaadlawon pa siya milinya sa vaccination site apan alas 10:30 na sa buntag nabakunahan gumikan sa kadaghan sa mga magpabakuna.

Matud pa nga wa dayon siya nagpabakuna gumikan kay sa sinugdan nahadlok siya ug mituo sa mga istorya-istorya nga nadungog ug nabasa sa social media ug ulahi na niyang naamgohan nga diay pulos lang fake news ang tanan.