GIHUGTAN karon sa Department of Trade and Industry (DTI) sa Davao Region ang ilang monitoring sa presyo sa mga produkto nga pang-Noche Buena human nga gipagawas ang bag-ong bulletin nga nagtumbok sa suggested retail price (SRP) niini alang karong tuiga.

Giklaro sa ahensiya nga mga patigayon, ilabi na mga groseriya ug supermarkets, kinahanglan nga istriktong mosunod sa pinakabag-ong gitakda nga SRPs aron nga di masilotan ug mamultahan.

Ang mga produkto sa Noche Buena mao ang mga sagol o food items nga kanunay nga iserbi atol sa kasaulogan sa Pasko ug Bag-ong Tuig.

Gisulti ni DTI-Davao Director Maria Belenda Q. Ambi nga base sa ilang bag-ong gipagawas nga SRP bulletin, kasagarang tanang presyo nagpabilin nga managsama lang. Kini bisan tuod kon ang ubang mga produkto dunay pagtaas, apan minimal lang kini.

Samtang gitambagan niini ang publiko nga mamalengke og sayo sa di dayon madaut nga mga produkto aron nga malikayan ang pagdasok sa Pasko.

Samtang nagpahimangno sab siya ngadto sa tanan nga kinahanglan nga magbinantayon sa pagsusi sa mga price tags base sa SRP list consumer products nga ilang gipalit. Kinahanglan nga ilang basahon ang "labels" ug itandi sa mga presyo sa laing mga brands.

Mahimong makita ang 2021 Noche Buena products' SRP Bulletin gikan sa DTI website, www.dti.gov.ph. Alang sa dugang pangutana, mga konsumante mahimong mokontak sa opisyal nga social media page sa pinakaduol nga buhatan sa DTI o mangayo og tabang sa Facebook page DTI-Davao. (Uban sa taho sa DTI-Davao Region)