TPUJ kutob na sa Abril; LTFRB: modern PUJ kuwang

USA ka opisyal sa Land Transportation Franchising and Regulatory Board (LTFRB) 7 mipahibawo niadtong Biyernes, Disyembre 10, 2021 sa total phase-out sa mga traditional public utility jeepneys (TPUJ) sugod sa Abril 1, 2022 sa mga karsada sa tibuok nasod.

Si Assistant Regional Director Reynaldo Elnar niingon nga nakadawat sila og Memorandum Circular 2021-21 gikan sa central office kalabot sa phase-out sa mga modernong jeepney sa tibuok nasod.

“Ang problema nato karon kay 846 ra ka modernized jeepneys ang nag-operate sa Metro Cebu,” matod ni Elnar.

Matod ni Elnar nga nagpabiling problema ang gidaghanon kay kuwang kini itandi sa numero sa mga pasahero sa Metro Cebu.

“Mao nga nag-operate gihapon ang atong mga bus kay ang kasamtangang tradisyonal ug moderno nga mga jeepney dili maka-serve sa panginahanglan sa mga pasahero,” matod niya.

Ang Assistant Regional Director sa LTFRB 7 nagkanayon nga ang mga LGU nagpabiling importante tungod kay kinahanglan nilang andamon ang local public transport route plan (LPTRP).

“Naay partisipasyon ang LGUs kay ilang ideterminar ang gidaghanon sa units sa matag rota. Ang LGUs usab ang mag-endorso sa rota ug ang LTFRB ang mag-evaluate,” matod niya.

Sa pagkakaron, ang Mandaue City ra ang adunay aprobado nga LPTRP samtang 30 pa ka LGUs ang nakasumite na.

Ang LTFRB 7 niadtong Marso 12, 2021 mihatag sa Mandaue City og notice of compliance alang sa pagkompleto sa plano, ang una sa Central Visayas region.

Tungod niini, gitakdang ablihan sa dakbayan karong tuiga ang upat ka bag-ong intracity nga ruta alang sa modernong mga jeepney nga makompleto ug maaprobahan ang LPTRP niini.

Matod ni Elnar nga dul-an sa 6,000 ka tradisyonal nga mga jeepney ang nag-operate sa pre-pandemic sa Metro Cebu.

Sa pagkakaron, wa kaabot sa 2,000 ka tradisyonal nga mga jeepney ang nagpabiling nagbiyahe sa karsada tungod sa inspeksyon sa road worthiness sa unit ug pagtugot sa local government units.

Alang sa displaced jeepney drivers, si Elnar niingon nga ang Technical Education and Skills Development Authority (TESDA) ug ang Department of Transportation (DOTr) motanyag og libreng skills training courses sa public utility vehicle (PUV) operators ug drivers nga apektado sa PUV Modernization Program.

Lakip sa mga kurso sa pagbansay nga gilakip mao ang pagmaneho, pag-install sa speed limiter, serbisyo sa sakyanan, paghimo og usab sa makina sa awto.

“Naa pa tay 1,000 ka bakanteng slots para niana sab,” matod niya.