Hayan di na mahitabo ang pagbaha sa lungsod sa Asturias human ang Cebu Provincial Government ug Department of Public Works and Highways (DPWH) nipirma og memorandum of agreement alang sa pagpanglimpyo sa Guinabasan-Sta. Lucia River, matod sa taho sa lungsod sa Huwebes, Disyembre 9, 2021.
Upat ka mga kontraktor ang gitahasan sa paghimo sa dredging sa suba sulod sa usa ka lugar usa ka kilometro gikan sa baybayon.
Ang tumong mao ang paghawan sa luna sa lapok, bato ug uban pang mga babag aron molapad ang dapit diin ang tubig modagayday paingon sa dagat.
Kini aron malikayan nga masubli ang dakong mga baha nga nahitabo sa lungsod sa samang buwan sa miaging tuig nga nakaapekto sa 156 ka mga pamilya sa dili mominos tulo ka barangay taliwala sa pagbunok sa uwan.
Subay niini, ang Opisina sa Gobernador nag-isyu og usa ka special disposal permit sulod sa duha ka bulan nga nagtugot sa pagpadala sa mga basura nga makolekta gikan sa dredging, matod sa Munisipyo sa Asturias sa usa ka Facebook post.
Ang upat ka mga kontraktor mobayad og P50 matag metro kubiko sa Probinsiya sa Sugbo nga nagrepresentar sa ilang extraction fee ug excise taxes.
Ang mga barangay Tubigagmanok ug Barangay Sta. Lucia makapaabot nga makakuha og bahin sa mga extraction fee nga makolekta sa Kapitolyo.
Ang munisipyo nipagawas sa pamahayag aron matul-id ang sayop nga pagtuo nga quarrying ang nahitabo sa Guinabasan-Sta. Lucia river.
Gitataw sa lungsod nga wala kini labot sa pagpili sa mga kontraktor.
Usa sa upat ka mga kontraktor nga nalambigit sa proyekto, Balamban Construction and Marine Services Ltd. Co., nipasabot nga ang katuyoan sa proyekto mao ang “pagkalot sa ubos nga bahin sa tulay paingon sa baybayon ug ngadto sa dagat” aron ang bisan unsang tubig sa ulan nga nakolekta dali nga modagayday sa dagat, imbes nga modagayday balik sa mga balay sa ubos nga mga lugar duol sa suba.
Ang kontraktor niingon nga nagsunod kini sa desinyo nga gihatag sa DPWH provincial engineering office, nga naghatag sa upat ka contractor og hiniusang tahas sa pagkuha sa 40,000 cubic meters nga dredge material sa usa ka metros nga giladmon duol sa tulay ug duha ka metros duol sa baybayon.
Sa miaging buwan, si Cebu Gobernador Gwendolyn Garcia nipahibawo nga ang mga suba sa tulo ka lungsod sa Sugbo sa ikatulong distrito kubkubon aron di na masubli ang dakong pagbaha nga nahitabo niadtong Disyembre 2020 dihang miawas ang mga sapa panahon sa kusog nga uwan.
Matod niya ang dredging himuon sa dagkong mga sapa sa Balamban, Asturias ug Tuburan.