“E kayu gagawa para king pamangan a banangnas,
nung e para king pamangan a lalambat king alang-anggang bye,
a ipagkalub ning Anak ning Tau kekayu.
Uling kaya na binili ning Dyos Ibpa
ing tanda ning pamanayun.”
~ Wan ? Dangka 6 : Sunis 27
(John 6:27)
“Uling ing tinape ning Dyos
Ya pin ya kukuldas manibat king banwa
at magkalub bye king yatu.”
~ Wan ? Dangka 6 : Sunis 33
(John 6:33)
“Iaku ing tinape ning bye;
Ninu mang lumapit kanaku e ya dumanup,
at ninu mang maniwla kanaku e ya kumawa.”
~Wan ? Dangka 6 : Sunis 35
(John 6:35)
***
Makatula yang makakarug at makapapiganaka ing sasabyan na ning metung kareng kakaluguran ku manibat pa inyang bingut kami at angga na mu naman ngeni. Nganang sasabi: “Agyang asna ka karakal salapi at asna karakal pibandyan“e mu no man dalan agyang kusing mu pati na imalan mung mangasanting–kasi ing pasulud da keka kayangu mu bye guntingan d’ya mu gulut ba reng apasulud keka.”
Tutu ita uling itang kakaluguran ming libing da antita ing gewa da karing tagan na inyang kukutkut da la. Ginting d’ya mu ing mal nang amerikana ba’yang apasulud da kaya. Pepatalnan deng libung pesus a papil at inyang kildas de keng kalalamlalaman ning aun bulaklak la mu at adwang balut a Sky Flakes deng pepabakal da kumwari kaya.
Ing kakaluguran ming mekapagumasid, agya mang masalapi ya balu nang deng atipun nang kata-kata e no adala king sumangid a bye agyang kusing mu o agyang kasakmal mung gabun.
Kalambat na nang titipun pibandyan at mayap namu apigunam-gunam na ing katutwan a mapalyari king kawakasan ning balang bye ning tau o nanu mang mabibye keti king metusikluban. Ing sablang pipagalan o penintunan ning tau mabaliyala mu king kapupusan ning bye na. Iti ing katutwan a alang makayampat malyari kekatamu ngang alang pasubali at alang makapangilag.
O ba’t ing tau akakalingwan na iti o e naman aiisip. Nung aiisip naman, pilililili na ing katutwan at lulumuran na king miyayaliwang bage pampakalingwan. Alak, sigarilyu, TV, sine, tigtigan a makalabwad, sugal, indredus at ngeni kapamilatan ding miyayaliwang aske o forems of social media nung nukarin ating pampalibang a lakwas magpakalingwan king tau king kayang e ayampat a payntungulan.
Makananu tamung ayarapan iti at bang e tamu mitakutan? Mayan at saguli mu ing paralan nung tukyan tamung masalese. Iti ya pin ing pamagsantung king o karing e abilang-bilang a Nwan a Lagyu ning Ginu (kapamilatan ding guru o tune talaturu) mengaku kekatamu kapamilatan ding dalit karing Banal a kasulatan’ing pamanungge, pamanggale at pamagdalit kareting Banal a Lagyu.
Anti karing sunis a mesambitlang minuna, ing guru king ketawan ning Ginung Yesukristu ya ing tinape ning bye a magkalub kekatamu king pengaku nang bye alang-angga ning Kakataskatasang Ibpa tamu ngan. Iti patunayan ding dakal a dalit karing Banal a Kasulatan at deng makatuki mapilan la mung alimbawa:
“Ing makasaup kekatamu ila pin ding Banal a Lagyu ning Ginu!”
~ Dalit 124:8
“Ikabus mu kami Ginu kapamilatan ding Lagyu Mu!”
~Dalit 54:1
***
Dake Talabaldugan:
1.mipakalam (pangdiwa) kinalam, mikakalam e sasaryan o e binalak. English “received some mercy unintentionally or unexpectedly for whatever cause or reason. Alimbawa king pamangamit: “Mipakalam ya pa ing baintau inyang misakab yang makadugpa lupa keng gabun uling asamul ne ing butil a gintung apamisali nang mal kaybat.”
2.mipakalampag (pangdiwa) kinalampag, mengalampag e sasaryan o e binalak. English “banged heavily on a surface that caused some big noise unintentionally or unexpectedly for whatever cause or reason. Alimbawa king pamangamit: “Keng sakit na lub ning mangarana keng siping ming bale mipakalampag ya inyang asna ne karakal kinanta e de pa mu rin biklatanan awang deng kababaynan.”
3.mipakalap (pangdiwa) kinalap, mengalap e sasaryan o e binalak. English “groped for something unintentionally or unexpectedly for whatever cause or reason. Alimbawa king pamangamit: “Keng danup ning bingut mipakalap ya kareng siping nang makakera uling meko yang sinaguli ing ima na.”
4.mipakalasag (pangdiwa) kinalasag o sinagka , migkalasag o mipasagka e sasaryan o e binalak. English “blocked using an armor or shield unmindfully or by surprise for whatever cause or reason. Alimbawa king pamangamit: “Bigla deng pemarug ing anak a bayung datang inya mipakalasag yang tambing at asagka na la’t apapulandit ding mamarug kayang dakal.”
5.mipakalat (pangdiwa) kinalat, mikalat e sasaryan o e binalak. English “got things scattered or spread out unintentionally or unexpectedly for whatever cause or reason. Alimbawa king pamangamit: “Mipakalat la keng dalan deng asna karakal a salapi inyang atabili ne ing bayung ning babaing mamisaling mangamal a miyayaliwang imalan.”
***
SADYANG GAWI at AMANU DA RENG KAPAMPANGAN
Paritak na lang paritak deng mamyalung burarul at guryun, pati na detang awsan dang karang-karang kareng anak king panaung kasalungsungan mekad pauli ning maralas pane namung computer mobile games deng pamyalungan da reti. Ing sisti e mo man malyaring pakisabyan kabang mamyalung la.
Inyang ala pang computer at cellphones kakasna ya ing dayatan karing magpatilo burarul, guryun o agyang karang-karang mu neng panaun a masikan ing labul ning agin manibatan keng pangulung-paralaya o ing awsan dang amyam deng kabalen a makatwa.
Alus kayagnan na niti ya pin ing pamangawang parul ding tata karing balng sibabale neng antining papasku na. Ngeni rugu, pane na lang sasali keng intersection o kareng maglakung parul deng kabalen. Paragdag nang paragdag ing gawi tamung makakalingwan kabang susulung ing panaun.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.