Namahayag si Cebu City Mayor Mike Rama nga hayan mahibalik ang physical activities sa Sinulog sa Enero sunod tuig kon makab-ot sa siyudad ang herd immunity batok sa Covid-19. Kana kon mabakunahan na ang kinabag-an sa katawhan ug protektado na bisan ang wa pa mabakunahi.
Ang Sinulog usa sa mga labing dagkong cultural events sa Pilipinas nga sagad dugokan sa daghang mga tawo gikan sa nagkalain-laing kalungsoran sa Sugbo ug sa ubang mga lalawigan, ingon man sa mga langyaw.
Tingali, kon mahibalik ang Sinulog, kinahanglan nga limitahan lang kini sa Cebu City Sports Center aron kadto rang mga tawo nga fully vaccinated ang linawas nga makatan-aw. Total makita man sab kini sa TV alang niadtong way bakuna.
* * *
Si Interior and Local Government Secretary Eduardo Año niingon nga niabot na sa 23 ka highly urbanized cities sa nasod ang nakakab-ot sa herd immunity. Naglakip kini sa mga siyudad sa Lapu-Lapu ug Mandaue. Apan wa pa ang Cebu City.
Si Dr. Mary Jean Loreche, tigpamaba sa Visayas Vaccination Operations Center, niingon nga ang fully vaccinated sa Mandaue miabot og 77.2 porsiyento sa ilang eligible population, samtang sa Lapu-Lapu kompleto sa pagbakuna ang 73.1 porsiyento sa ilang eligible population sa Disyembre 6, 2021.
Ang Mandaue nakahatag na usab og first dose ngadto sa 301,939 ka mga tawo o 106.69 porsiyento sa 283,006 nga target population. Ang Lapu-Lapu nakahatag na og first dose sa 342,852 ka mga tawo o 107.65 porsiyento sa 318,480 nga target population.
* * *
Nganong wa pay herd immunity ang Cebu City? Tungod tingali kay mas dako ang target population sa siyudad sa Sugbo nga 719,979 o 70 porsiyento sa populasyon sa siyudad nga 1,028,542. Sobra pa kon doblehon ang target population sa Lapu-Lapu.
Gamay na lang og kuwang aron makab-ot sa siyudad ang herd immunity. Sumala sa National Covid-19 Vaccination Dashboard, sa Disyembre 6, 2021, fully vaccinated na ang 64.32 porsiyento sa target population sa Cebu City.
Makab-ot kini kon makompleto sa bakuna ang 55,809 ka mga tawo o 7.7 porsiyento sa target.