BISAN pa sa mga kalisdanan nga atong nasugatan sa miaging tuig ug hangtud karon tungod sa Covid-19 pandemic diin daghan ang mga namatay ug nawad-an sa panginabuhian, apan tungod sa atong pagsaulog ning Pasko sa pagkatawo ni Hesukristo, ang atong Diyos nga manunubos, di kalikayan nga duna tay mga kalihokan sama sa Christmas Party ug uban pa.

Niadtong Domingo, December 12, ang mga maestra sa usa ka elementary school sa usa sa mga dakbayan dinhi sa Sugbo nagpahigayon og Christmas party sa usa ka beach resort. Matud pa sa akong tinubdan (di lang nako hinganlan), nga nagpadala nako og text message, nga P2,000 ang amotan sa matag maestra.

Ang problema, matud pa sa akong tinubdan, kay ang kadaghanan sa mga maestra miangal sa kadako sa amotan nga P2,000 atol ning panahon sa kalisud ug naa pa gihapon ang Covid-19. Ang paet pa gyud, matud pa sa akong tinudban, kay gipugos og paamot ang mga maestra sa ilang principal bisan dili moapil sa maong Christmas party.

Ang giapas aning principal mao ra gyud ang paglipay ug pahahay sa aning beach resort bisan nia pa ta sa panahon ang Covid-19, nga duna nay Omicron variant? Wa ta moingon nga di maglipay ning panahon sa Pasko bisan naa tay giatubang nga pandemya. Apan, kon ipamugos ang amotan nga P2,000 bisan sa dili moapil, di na sad na maayo ug mao na gitawag sa inenglis nga "coercion."

Matud pa sa akong tinubdan, ang mga maestra nga dili unta moapil sa maong party midunol sa ilang amot nga P2,000 nga walay kusmod. Haylabi og ibalhin og lain assignment, komedya pa sa akong tinubdan.

Nasayop ko sa akong pagtuo nga ning panahon sa Duterte administration, nawagtang na ning ingon ani nga klase sa pagdumala sa mga opisina o trabahoan sama sa mga public schools. Bisan og ipaabot pa ni sa Malakanyang, dili na ni maatiman tungod ning panahon sa pasko ug sa umaabot piliay, diin ang kadaghanan sa mga opisyal sa goberno mikandidato, di na gusto nga moimbestigar aning mga gagmay nga kaso.

Sa mga maestra, nga ingnon tang pung biktima sa pugsanay nga amotan alang sa Christmas Party, kon dili mo mopasaka og sumbong ngadto sa DepEd, ilakip na lang na ninyo sa listahan sa di maayo nga kasinatian sa inyong kinabuhi.

***

NO CONTACT. Ang dakbayan sa Mandaue mopatoman sa ilang giingon nga "no contact apprehension program" (NCAP), kon pagpanakop sa mga nakasalaod sa trapiko nga dili ang traffic enforcer mismo ang manakop. The first of its kind ni sa tibuok nasud, matud pa sa press release sa Public Information Office.

Kini nga sistema dugay na nga gi-implementar sa mga nasud nga adunahan ug strikto nga nagpatuman sa mga balaod. Ning panahon sa Covid-19 maayo ni alang sa mga traffic enforcer aron mahalikay sila sa posible nga takod sa sakit. Ang problema nga akong nakita mao ang way klaro nga address sa drayber ingon man ang rehistro (plaka) sa mga sakyanan. Apan, angayan nga ipadayon sa Mandaue City.