Diputado:Bad news sa oposisyon

WA na gyoy drama nga mahitabo karon – klaro na man nga mi-withdraw na si Senador Bong Go isip kandidato sa pagka-presidente. Diha man goy estorya nga drama ra ang withdrawal ni Go kay wa pa man gikuha sa Comelec ang mga dokumento. Drama kay mahimo pa padayonon iyang kandidatora bisan mideklarar na siya nga mo-withdraw. Karon nga gi-withdraw na gyod si senador, wa nay drama nga mahitabo. Parehas ra pod sa sitwasyon ni Presidente Rodrigo Roa Duterte nga mikandidato pod sa pagka-senador. Gibalita kagahapon nga mismo si PRRD ang miadto sa Comelec aron pagkuha sa iyang mga dokumento. Wala na poy drama nga mahitabo kay di na man siya kandidato. Buot ipasabot, mahitabo gyod ang gisaad ni PRRD nga mopahuway ug mouli na siya sa Davao inig kahuman sa iyang termino. Buot ipasabot sab, makapagusto na siya og kampanya sa iyang mga piniling kandidato. Bad news kini sa oposisyon. Kon di na kandidato si PRRD, unya igo na lang siya nga motiwas sa iyang termino hangtod sa bulan sa Hunyo sunod tuig, unsa na man lang ang iyang buhaton samtang magpaabot sa Hunyo? Siyempre, mangampanya sa iyang mga kaalyado. Unya kay Presidente man siya hangtod Hunyo, magamit pa niya ang tanang mga gahom sa iyang opisina hangtod sa udto sa Hunyo 30, 2022. Matod pa, ang endorsement sa Presidente dako kaayo og epekto sa kandidatora sa usa ka pulitiko. Gani, mag-ilog man ang mga kandidato nga magpa-isa sa ilang mga kamot ni PRRD dayon pahulagway dayon. Kon ibutang sa tarpaulin ang maong hulagway, dako kaayo kini og epekto sa mga dumadapig ni PRRD sanglit klaro man kaayo nga gisuportahan sa Presidente ang ilang kandidatora. Unsa na kaha kon mouban pa gyod si PRRD sa mga kampanya unya siya mismo ang moawhag sa katawhan nga pasuportahan ang usa ka kandidato? Dili ikalimod nga bug-at kaayo kini nga pag-endorso sanglit hangtod karong mga panahona, baga pa man gihapon sa katawhan sa nasod ang nagtuo nga maayo ang pagdumala ni PRRD. Taas pa gihapon ang iyang performance ug trust ratings. Nagpakita lang kini nga lig-on pa kaayo si PRRD sa mata sa katawhan. Kon magkuyog-kuyog si PRRD sa mga rally sa iyang mga kaalyado, sama sa mamunbon na sab ang oposisyon niini. Kahinumdom pa tingali mo sa nahitabo sa otso derecho? Yabo tanan ug gilampornas og taman-taman human sa piniliay. Bad news o good news ang pag-withdraw ni PRRD?