WALA na kahigayon og sulod sa balay ang 29 anyos nga lalake nga bag-uhayng miabot gikan sa iyang lakaw sakay sa Suzuki S-Presso sa dihang riding in tandem mibanhig-patay kaniya. Ang pagpamusil nahitabo kagahapon, Disyembre 14 sa buntag, sa dalan A.P. Cortes, eskena dalan Lopez Jaena, Barangay Tipolo, Mandaue City. Gi-ila ni Police Major James Conaco, hepe sa Station 2, Mandaue City Police Office ang biktima nga si Ervin Dunhill Inocando, 29, kasamtangan nga nagpuyo sa Deca Homes, Barangay Tipolo, apan lumad nga taga Carcar City.
Base sa inisyal nga kasayuran nga mipa-uli sa iyang gi-abangan nga balay sa Tipolo si Inocando sa dihang gi-atangan sa riding in tandem. Igo nga miabot si Inocando tungod sa balay, gipusil siya sa gunman nga nag-angkas sa motorsiklo.
Nakagawas si Inocando sa sakyanan, apan giusban og pusil mga 30 metros ang gilay-on gikan sa gidaganan kay nibalik ang gunman human nakabantay nga nidagan ang biktima.
Nahagba si Inocando nga nakaangkon og daghang mga samad sa lawas. Namatay siya diha-diha.
BADLUNGON?
Sa dihang gisusi ang background ni Inocando, nasuta nga adunay siyay duha ka kasong gi-atubang sa Lungsod sa Argao nga alarm and scandal ug illegal possession of firearms.
“Nakagawas ni siya niadtong March 2021 ug naa pani siya case nga on going pa ang trial, medyo naa gyud pagka badlongon ning bata-a,” tipik sa pamahayag ni Conaco. Mga sakop sa Scene of the Crime Operatives (SOCO) nakahipos og 9mm revolver ug mga bala gikan sa crime scene. Usa sa susihon sa kapulisan ang personal nga bangi nga gikalambigitan niini nga posibleng motibo sa pagpatay.
“Actually duna na tay lead pero sa pagkakaron dili pa nato ma- reveal gyud noh, kon unsa ang posibleng motibo? Duna man gud na post sa FB nga nasuko sa biktima nga mao na atong subayon usab,” saysay ni Conaco.