NADISMAYA si Lapu-Lapu City Mayor Junard Chan human nga wa aprobahi sa mayoriya sa mga sakop sa konseho ang proposal sa katukoran sa Lapu-Lapu Expressway project. Usa ka special session ang gipahigayon kagahapon, Disyembre 14 alang sa maong katuyoan uban sa presensiya sa tulo ka representante sa developers sa maong proyekto. Gibutyag ni Konsehal Michael Dignos, chairman sa committee on infrastructure, nga adunay silay nakita base sa nalatid sa joint venture agreement (JVA) nga gihulagway nga disadvantageous sa Dakbayan.
Numero unong gikuwestiyon sa maong JVA ang tax exemption sa tulo ka construction firm sulod sa 50 ka tuig nga dili magbayad sa dakbayan sa ilang business ug real property tax. Ang gikabalak-an nga epekto unya kon sirhan ang Aviation road diin motadlas ang maong expressway ug uban pa.
“Nadismaya ta noh sa maong resulta gumikan kay wa tan-awa sa mayoriya sa Konseho ang sitwasyon kon mag-abli na ang 3rd bridge sa first quarter.
What will happen to Lapu-Lapu City? Inutil sa trapiko ang Lapu2 City,” matod pa ni Chan. Nasagmuyo ang mayor sa dihang wa makita sa mayoriya sa Konseho ang kaayuhan sa maong proyekto alang sa mga Oponganon, ilabi na nga way gasto ang Siyudad sa maong multi-billion peso project. “Mao untay huna-hunaon sa mga konsehal nga angay man gani ta magpasalamat nga dunay proponent nga atoang gihangyo despite of this pandemic nga motabang sa pagsulbad sa ekonomiya sa siyudad,” yawyaw sa mayor.
Si Konsehal Flaviano Hiyas, sa iyang bahin, nitataw nga wa sila mosupak sa proyekto nga maghatag og kalambuan sa dakbayan, nangayo lang sila og katin-awan ug konkreto nga basehan nga dili masugamak ang Siyudad sa alaot. Ang mga sakop sa konseho nga wa mopabor sa JVA mao sila si: Dignos, Hiyas, Alexander Gestopa, Rico Amores, Rex Mangubat, Rodolfo Poto ug Eduardo Cuizon. Samtang ang mipabor sa proyekto sila si Konsehal Nelson Yap, Efren Herrera, Queenie Amman, Janvi dela Serna ug Lyka Tampus. “Magbutang ko og billboard sa tanang barangay, magbutang ko kinsay ni babag ug wala ni babag,” panapos ni Chan aron sa pagpahibawo sa kinabag-an kon si kinsay angay basulon nga wa malahos ang proyekto.