TULO ka gikatahapang mga mangunguot nadakpan sa ginukdanay tali sa ilang biktima ug mga traffic enforcer sa Cebu City Transportation Office (CCTO) pasado alas 11 sa Martes sa buntag, Disyembre 14 sa Barangay Luz, Dakbayan sa Sugbo.
Ang tulo nga nasikop mao silasi Richard Maunes, 44, ug Marvin Enriquez, pulos taga Barangay Guinsay, Dakbayan sa Danao, amihanang Sugbo ug si Otto Otero, taga Barangay Jagobiao, Dakbayan sa Mandaue.
Si Police Senior Master Sergeant Nicolo Gonzales sa Mabolo Police Station niingon nga usa ka Johnrey Quijano, 24, service crew sa ka iladong tindahan, ang gibiktima sa tulo.
Si Quijano nagsakay sa usa ka PUJ dihang gisultihan siya sa tulo nga dunay laway sa iyang abaga dungan sa pagsige og samok kaniya.
Usa sa tulo nakahigayon sa pagkuot sa iyang cell phone, apan uwahi na siyang nakabantay kay nakakanaug na ang tulo sa Barangay Luz.
Sa pag-abot sa unahan, nakakita siya og mga traffic enforcer, nikanaug siya sa PUJ ug daling nagpakitabang.
Dinhi nahitabo ang ginukdanay tali nila ni Quijano, duha ka traffic enforcers ug nila ni Maunes, Enriquez ug Otero
Ilang naapsan ug nasikop ang tulo ug nabawi ang cell phone nga balor og P7,000.
Gi-turnover ang tulo ngadto sa mga pulis sa Mabolo Police Station, diin sila kasamtangang gibalhug.
Sa interview sa Superbalita ug Sun Star Cebu, ang tulo ning-angkon sa ilang "kabuang" apan depensa nila karon lang ni nahitabo.
Samtang si Gonzales midugang nga daghan na ang nangabiktima sa ilang area of responsibility sa susamang modus, apan dili siya makaingon nga ang tulo maoy responsable.
Awhag hinuon ni Gonzales sa publiko nga kon kinsa katong nabiktima sa samang mudos, moduaw sa police station aron pagtan-aw sa tulo ka mga suspek sa ingon mapasakaan og kaso.
Niawhag usab siya sa publiko nga magmatngon panahon ning Pasko kay maoy tiglihok sa mga kriminal.