GIHIMAKAK sa Davao City Police Office (DCPO) nga nagpagawas og memorandum nga nagdili sa mga wala pay bakuna nga indibiduwal nga makatambong og Misa De Gallo o Simbang Gabi sa bisan asang mga parokya sa dakbayan.
Kini isip tubag sa hulagway nga nagkatap sa online nga giduso sab ngadto sa SunStar Davao.
Sumala sa gialegar, nagsuwat matud pa si Toril police station commander Police Major Michael Uyanguren ngado ni Fr. Victor Isidoro Gilay, Santo Rosario Parish priest, ug nag-abiso nga kadto lang mga fully vaccinated nga indibiduwal ang makatambong og Misa De Gallo, ang siyam ka adlaw nga tradisyonal nga misa una ang Pasko.
Kini matud pa kabahin sa mga sumbanan sa DCPO sa paglusad sa maong mga misa.
Apan si DCPO Spokesperson Police Major Rose Aguilar nagsulti nga gilayon niyang gitawag ang atensiyon ni Uyanguren aron nga masayran kon miisyu ba kini sa maong memorandum, ug nangayo og "reference" sa pag-isyu sa maong mando.
"Iyahang gidili ug gi-deny nga wala siya'y gi-issue nga ing-ana na memorandum," butyag ni Aguilar Miyerkules, Disyembre 15, atol sa Armed Forces of the Philippines-Philippine National Police (AFP-PNP) Press Conference.
Matud ni Aguilar nga personal niyang nadawat ang kopya sa screenshot, apan gihimakak nga ang DCPO nagpagawas og sama niini nga memorandum kay mosunod lang sila sa mga sumbanan nga gitakda sa Inter-Agency Task Force for the Management of Emerging Infectious Diseases (IATF).
Gipaneguro niya nga nakigkoordinar sila sa tanang mga parokya sa dakbayan.
Apil sa mga palisiya nga giimposar sa DCPO sulod sa bisinidad sa simbahan mao ang "one entrance, one exit" policy," 50 porsiyento nga maximum capacity sud sa simbahan, ug maximum 70 percent sa gawas, ug ang istriktong pagsunod sa physical distancing.
Giawhag sab ni Aguilar ang mga menor ug senior citizens, kon mahimo, motan-aw na lang sa virtual mass kay gikonsidera sila nga peligro sa kagaw.
Kini bisan pa man sa probisyon sa Alert Level 2 status nga nagpalukmay sa mga restriksiyon sa mga menor ug seniors sa paggawas.
Si Mayor Sara Duterte-Carpio, sa paghinabi kaniya sa 87.5 FM Davao City Disaster Radio niadtong Lunes, Disyembre 13, wala maghisgot nga wa mabakunahi nga manimbahay did-an sa pagtambong og mga misa sa Pasko.
Inay giklaro sa mayor mao ang istriktong pagsunod sa minimum health protocols.
Gisulayan pa sa SunStar Davao sa pagkuha og pahayag gikan kang Fr. Gilay ug sa Santo Rosario Parish.