SAMA sa mga nangaging election season, ang beterano ug award-winning composer-Bisaya rapper sa Sugbo nga si MC Rey Nacilla ang usa gihapon karon sa mga pinaka-busy nga manghimoay og campaign jingle sa tibuok Kabisay-an ug Mindanao.
Bisan pa sa krisis dala niining pandemya nagpadayon ang operasyon sa iyang “Brownian Records and Production” sa Barangay Mambaling nga mag-17 na katuig sa industriya.
“Tungod na sa pagsalig nila nako ug sa maayong relasyon nga akong giampingan sa daghang katuigan mao nga bisan pandemic kaluoy sa Ginuo survived gihapon kay tried and tested na nila ang akong serbisyo,” esplika sa 48-anyos sa interbyu sa Superbalita Laysho.
“So far, naa koy gihimo karong mga 30 ka campaign jingle. Although wa pa siya gipatukar kay sa March pa man magsugod ang kampanya sa local,” ni MC Rey nga unang nailhan sa iyang mga alegreng Bisaya rap sama sa T-bak, Pasikat, Gugmang Giahak ug Pinasagdan sa Kusina uban sa iyang kanhi grupong Brownian Method.
“About sa akong rate mo-adjust ko depende sa budget sa client. Kon ganahan sila og nindot jud ug original ang tono siyempre medyo mas mahal. Di lalim mag-produce, mag-areglo, magsuwat, mangitag singer ug recording pa. Kay puros man mga professional ang mo-handle sa kanta uban sa akong business partner, arranger ug studio owner nga si Nendel Endrina.”
Si MC Rey niangkon nga nagkamang pa sila sa pagkakaron sanglit wala pa gyud kabalik sa normal ang industriya. Apan masaligon siya nga makabangon ra gihapon ang tanan.
Si MC Rey gawas nga nag-pioneer sa Bisrap, event organizer ug co-producer sab siya sa mga dagkong event sa Sugbo. Nahimo siyang finalist sa 2008 Awit Awards sa Manila ug siya sab ang interpreter sa grand prize winning entry nga “Nalumos sa Sabaw” (RnB category) sa Cebu Pop niadtong 2015.
MC Rey Nacilla, Ssssuper Ka!
Dunay presidential or senatorial aspirant nga nagpahimo nimo og jingle?
Secret lang kay dili sila pareho og partido.
Pilay magasto magpahimo ron og jingle?
Kon national normally magduwa sa P30K to P50K. Sa Manila mas doble pa ang presyo labi na kon dunay pangan ang composer ug ang arranger.
Unsay nindot nga jingle para nimo?
Dapat gyud catchy, easy to recall ug dali ra masabtan. Taas og kalidad ang akong mga hinimo kay studio recording man gyud ni akoa ug mga professional musician ang mo-record.
Unsay mga jingle nimo sa una?
Calda Pizza kanang gipatukar pirme sa WRock, Ninjazinc Adhesive, Wes Worldwide Education Services, Gateway Motors, Richmond Plywood, Restime Food Supplement, Scents and Blend perfume ug daghan pa. Bag-o lang sad ko nahuman og record sa Fry It Palm Cooking Oil jingle sa Malaysian Palm Oil Council nga i-launch next year. Then naa say Taurus Prime Surplus, Cosap jingle ug Bokita Malaysia Islam Scarf.
Any upcoming shows?
Lisud pa tungod sa mga health and safety protocol. Although busy sad ko karon sa pag-assist sa mga corporate events nga gi-handle sa akong Brownian Records and Production. Pero dili pa jud siya dinagko ug mostly mga virtual event pa with my partner, GCE Green Concept headed by Mr. Steven Sasam. Kami mo-provide og artists ug mo-handle sa sounds, lights, led wall ug ubang technicalities. Magpasalamat ko sa akong mga suki nga naa gihapon bisan pandemic sama sa Tsuneishi Heavy Industries, Lear Corporation, Autoliv, Mitsumi, Taiyo Yuden, Cebu Funai, E-Mall, Starmall ug Cebeco LGUs. I’m also releasing a new song and a music video with singer Marielle Montellano this January.
Unsay wish nimo sa Pasko?
Good health sa akong pamilya ug ma-vaccinan na unta ang tanan sa event industry ug sa mga sama nakong composer aron mabalik na sa normal ang atong kinabuhi nga wala nay pandemya ug Covid restrictions.