IBALIK ni presidential aspirant Senador Manny Pacquiao ang kuwarta sa mga miyembro sa Kabus Padatuon (Kapa) sa higayon nga siya ang modaug sa lokal ug national nga piniliay sa 2022.

Kini ang gibutyag ni Pacquiao atol sa gipahigayong press conference sa Big 8 Hotel sa Siyudad sa Tagum, Davao del Norte niadtong Miyerkules sa hapon, Disyembre 16, 2021.

Giingong naa na kang Pacquiao ang datus sa mga miyembro nga iyang nakuha gikan kang Pastor Joel Apolinario, ang founder sa pundok ug sa higayon nga siya ang modaug pagka-presidente mapadali ang pagbalik sa kuwarta ngadto kanila.

Hinuon, giklaro ni Pacquiao nga ang capital lamang ang iyang mabalik ug wa na'y labot ang interest. Kinahanglan sab nga ipakita sa mga miyembro ang certificate nga ilang gihuptan kung asa nakasulat ang kantidad sa kuwarta nga ilang na"pay in" sa Kapa.

Naluoy matud pa si Pacquiao sa mga kabus nga miyembro labi na ngadto sa mga nagbaligya sa ilang kayutaan ug kabtangan aron nga dunay ikabutang kaniadto sa Kapa

Tungod niini, daghan ang nalipay ug nanghinaut nga tumanon sa senador ang saad.

Apan taliwala niini, duna say naguol gumikan kay dugay na matud pa nangawala ang ilang certificate kon diin ang uban miingon nga ila na kining gisunog tungod sa kalagot sa ilang gidangatan sa Kapa.