KADA adlaw duna tay bag-ong ma ila-ila unya ang uban nila mahimong suod nga higala. Maihap ini ang sa ngadto ngadto ma barkada labi na niadtong puparehas nato og kinaiya o susama nato og hilig ug mga gusto.
Sa taas nga panahon sa panagkuyog-kuyog o uban, di malikayan nga dunay mga higayon nga mahitabo ang panagbingkil o di pagkasinabot hangtod nga modako dayon mag umido unya mo buto sama sa bulkan.
Unsa may timailhan sa higalang nega, ang pinamubo sa pulong nga negatibo?
Matod ni life coach Uchenna Ilo, mailhan nimo kining mga negatibong higala kay di man kini sila malipay ug di makig-hudyaka kon duna kay bag-ong nakab-ot o maayong naabot sa imong kinabuhi. Panan-aw ini niya nimo ka kompetensiya imbis ka-alyado maong magselos sa dayon kay gusto man sab niya nga makab-ot ang imong naabot.
Paminaw sab ini nila, sila ang da best kay sa ilang pagtuo kanunay silang insakto unya di makahibalong masayop. Nagtuo ni sila nga ang ilang binuhatan maoy labing insakto unya kon duna man ugali kakulian o sayop dali kining makatalikod unya kusog mamasa sa problema o sayop ngadto sa uban.
Ganahan sab kaayo ni silang mamasangil sa isyu ngadto sa uban unya di mang-gilabot kon dunay kakuli-an. Paspas kaayong makahugas sa kamot aron ingnon nga way apil unya maka-ikyas sa kakulian.
Ganahan sab ni sila kaayo makig-lalis imbis mangita og paagi para masulbad ang isyu. Unya kon maglantugi na gali, kinahanglan sila gayod pirmi ang labing mananaog sa argumento kay di man magpapilde.
Segurista sab ni sila kay kusog manguha sa huna-huna, pulong, buhat, butang o binuhatan sa uban apan obserbahi kay kon sila na gali ang pangayoan og tampo, dugay kaayong makakuot sa lawom nga bulsa kon para na nimo.
Di symbiotic ang relasyon kay wa may ‘give and take’, kanunay ang pabor naa ra sa nila.
Kusog sab kaayo ni sila mang-libak inig talikod nimo unya nagkaminus ang panan-aw sa uban. Mas malipay ni sila sa kapakyasan, kaluya, kalisod o kasakit sa uban.