GITUMBA sa bagyong Odette ang mga serbisyo sa kuryente, tubig ug telekomunikasyon sa dakong bahin sa Sugbo dihang mihapak kini sa isla niadtong Huwebes sa gabii, Disyembre 16, 2021.
Dala niini ang kusog nga hangin nga 175 kilometros matag oras duol sa sentro nga adunay unos nga moabot ngadto sa 240 kilometros matag oras dihang mihapak sa dakbayan sa Carcar sa habagatang Sugbo alas 10 sa gabii sa Huwebes.
Hangtud alas 4 sa hapon Biyernes, Disyembre 17, wala gihapon ang kuryente sa daghang bahin sa Metro Cebu ug ang Visayan Electric, nga nagserbisyo sa gibana-bana nga 1.73 milyones ka tawo sa mga dakbayan sa Sugbo, Mandaue, Talisay, Naga ug upat ka lungsod sa dakong bahin sa Metro Cebu -- Liloan, Consolacion, Minglanilla ug San Fernando -- wala pa makahatag og bana-bana kanus-a makabalik ang kuryente sa ilang franchise area.
“Much as we would like to energize our franchise area right away, the magnitude of the damage caused by the typhoon prevents us from doing so. We will conduct line clearing operations first before restoring power,” matod sa opisyal nga pamahayag sa Veco.
Nangayo sila sa pagsabot sa ilang mga konsumidor.
Nangayo ang kompaniya sa pagsabot sa mga kostumer niini nga dili dayon makaatiman sa ilang mga kabalaka, giingon nga ang mga miyembro sa ilang team biktima usab sa bagyo ug gisiguro usab ang kaluwasan sa ilang tagsa-tagsa ka pamilya.
Pagka alas 2 sa hapon Biyernes, ang Metropolitan Cebu Water District (MCWD) niingon nga ang ilang suplay gikan sa bulk water supplier nga Cebu Manila Water Development (CMWD) sa lungsod sa Carmen “anam-anam usab nga misaka.”
Gitumbok sa MCWD ang mga dapit nga naapektuhan nga mao ang lungsod sa Compostela, Liloan ug Consolacion; dakbayan sa Mandaue ug Lapu-Lapu; ug ang mosunod nga mga dapit sa dakbayan sa Sugbo: M.J. Cuenco Ave., Lower Mabolo, North Reclamation Area, Pier Area; Barangays Carreta, Lorega San Miguel, Tejero, T. Padilla ug Tinago; ug Bahin sa Imus.
Ang pasilidad sa CMWD nagkuha sa tubig gikan sa suba sa Luyang sa Luyang, Carmen, Cebu.
Niadtong Huwebes, pipila ka oras sa wala pa ang bagyong Odette moabot sa Sugbo, ang MCWD nipahibawo nga nahunong na ang operasyon sa mga bomba niini sa tibuok franchise area tungod sa lapad nga power service interruptions sa Visayan Electric ug Mactan Electric Co. Inc.
Matod niini nga nahunong na usab ang suplay sa tubig gikan sa Carmen tungod kay nalubog na ang tubig.
Sa bahin sa mga serbisyo sa telekomunikasyon, ang Globe Telecom niingon nga ang kusog nga hangin ug pagbunok sa ulan ni Odette nakaapekto sa data ug mobile services niini sa Visayas ug Mindanao.
Sa alas 11 sa buntag sa Biyernes, ang mga apektadong probinsya mao ang Cebu, Bohol, Leyte, Southern Leyte, Samar, Iloilo, Eastern Samar, Western Samar, Negros Occidental, Negros Oriental, Siquijor, Guimaras, Dinagat Islands, Surigao del Norte, Surigao del Sur, Agusan del Norte, Bukidnon, Camiguin, Zamboanga del Sur ug Zamboanga Sibugay.
Ang Globe niingon nga ang pagkapawong nagagumikan sa daghang pagkaputol sa fiber ug kakuwang sa commercial power.
Ang telco miingon nga ang mga paningkamot sa pagpahibalik nagpadayon, ug nga ang LTE@Home Postpaid, Broadband Wireline nga mga serbisyo ug mga serbisyo sa GOMO anaa na ug magamit na.
Way balita gikan sa Smart Communications sa sitwasyon sa Sugbo pagka alas 6 sa gabii. Biyernes.