"Maging mapagbante. Tikdo matatag king kasalpantayanan.
Maging matapang. Maging masikan.”
~ Mumunang KorintuDangka 16 : Sunis 13
(1 Corinthians 16:13)
“E tamu sasawa king pamandapat mayap,
uling king panaung makatakda pumupul tamu nung e ta tutuknang.”
~GalasyanuDangka 6 : Sunis 9
(Galatians 6:9)
“Inya sa, kapatad a pakamalan, tikdo matatag.
E ta paimburisan ing nanu man galon na kayu.
Parati yung ibili ing sarili yu king pamangawa para king Ginu,
uling balu yung ing gawa para king Ginu e masayang.”
Mumunang KorintuDangka 15 : Sunis 58
(1 Corinthians 15:58)
“Daptan yu ing pekamayap yung miyarap king Ginu anting mitangwanan,
Ing talapanggawa a e sukat dumine at makatud nang tatalnan ing katutwan.”
~ Kadwang Timoteu 2 Dtangka 2 : Sunis 15
(Timothy 2:15)
“Kababan lub, kelang-pamagmaragul, kelang-katampalasanan, pamibata, kayanwan, pamaglapit king tune ginung pangdiwa, kalinisan, katatagan at pamanampat king sarili; pamanyakwil karing parikilan ning pamikabsi ring panandam, kelang maling kasarilinan, ing kamalitan king karokan ding beytan, kamatayan, ketwan at kasalunan; kelang pangatali karing anak, asawa, pibale-bale, at aliwa pa, at pamipante-pamisip sagsag ning masampat at e masampat a kapalyaryan; parati at alang salat a pamanyuyu Kanaku, pamanyalagi karing makakawaning nangan, kelang pangasuglung karing keraklang maldang tau; pamanagggap king ulaga ning pamangilala king sarili, at mapagmatulid a pamagdulap para king Kalusuk-lusukang Katutwan—deit ngan pabalu Ku keka anting belwan, at ing sanung salungat kaniti kelambelwan.”
~Dalit ning Kakataskatasang Panginwan Dangka 13: Sunis 8-12
(The Song of God 13:8-12)
***
E la mu ditak ding sangkan bang murung tamu at itabili ing kektamung gagawan bang ing kasuywan tamu king Ginu kambe ning kasuywan mu naman karing aliwa. E la malyaring pikawani deng adwang deti. Ing panaung kasalungsungan magdala yang dakal a sangkan bang mangayna tamu lub, e na makyalam at e na bumulad. Dapot dakal a makataya bang murung tamu king pamanggalo para king katutwan.
Dakal la upaya, sikanan at ketawan ding kasalang at ini makapangayna lub dapot sukat tamung e lakwas tuknang, murung, e na kimut at lukuluk namung manalbe king mangapalyari o magpyak, manakap asbuk at mata namu kabang daralanan karing panamdam tamu’t kamalitan ing e pakatud a kararaptanan.
Sukat ta’ping sumulunge murung. Sukat tamung tikdoe kabud na’lulukluk at manalbe nanu-nanu dapot makapyak mata king mangapalyari. Sukat tamung makirandam, lumawe at magsalita king nanu mang paralan bang manawa tamung sikanan ning diwa. E la mu ditak ding kasalang a pakakalat king metusikluban. Kata-kata la agyang king saguling bilang mu.
Misusumangid ing sangkan bang lumaban pa mu rin salang ning kalaraman, kapamiraytan at pamagkumwari. E mayap ing tuknang at sumuku. Alang malyaring panyulung nung antita. Ing metusikluban kisna yang kapamiraytan ning pamangamakalabwad.
Ing tipan na ya pin ing ligaya karing miyayaliwang bage keti king yatu at lilingad na ing tune o tutung ligayang malyari mung manibatan king diwa o ing upaya nang lakwas masikan ning Ginu. Ing labwad pangsaguli ya mu. Ing diwang kaladwa at ing Penibatan na ala lang angga.
***
Dake Talabaldugan:
mipakibat (pangdiwa) mipamakibat, mekibat karing balang metung e sasaryan o alang balak. English – replied to each other, usually in a harsh manner, unintentionally or unexpectedly for whatever cause or reason. Alimbawa king pamangamit: “Mipakibat la reng mikaluguran dikil keng nung ninu ing lakwas mayap a manungkulan inya mipate la inyang kelambatan.”
mipakibatan (pangdiwa) mirinan pakibat e asaan, inyad o e inyad. English – got an answer, reply or responded to from something or someone unintentionally or unexpectedly for whatever cause or reason. Alimbawa king pamangamit: “Kanita na pa ipangadi dapot ngeni pamu mipakibatan ing pamanyawad nang supling ning siping ming bale matwa na para mikayanak.”
mipakilala (pangdiwa) mirinan pamikilala o pamipaulaga, mekilala, mekilalang e sasaryan o alang balak. English – got recognized or recived a form of recognition or citation unintentionally or unexpectedly for whatever cause or reason. Alimbawa king pamangamit: “Mirinan ing ulaga da ring gagawan nang kayapan Tatang Edung ngening mipakilala karing malda a ya pala ing kanita pa gagawa.”
mipakiling (pangdiwa) kiniling o migkiling e sasaryan o alang balak. English – leaned to one side unintentionally or unexpectedly for whatever cause or reason. Alimbawa king pamangamit: “Undu-undu ya ing dalagita inyang mipakiling ya keng pago ning kasiping na keng sasaken da papunta Menila.”
mipakimut (pangdiwa) ginalo, kinimut o migalo, mipagalo e sasaryan o alang balak. English – moved, made a move; acted or did something unintentionally or unexpectedly for whatever cause or reason. Alimbawa king pamangamit: “E na sasaryang ing mipakimut ya ing baintau inya menabu la pati kataid nang daralakit keng makitid a talete keng sapa.”
***
SADYANG GAWI at AMANU DA RENG KAPAMPANGAN
Nenng panaun ning pa-Paskung anti ngeni, deng bale kanita uling keraklan dutung la–gawa keng kwayan o dutung impun–panisisian da lang binit bayu pa datang o kabang miyayampang ing apulung aldo ning simbang bengi o simbang galingaldo.
Gagamitan dang panisis kanita ya pin itang awsan dang “pakiling” o metung a uri ning bulung a magaspang dapot akakwa mu kareng mula da ring sibabale karing keraklang kabalantyan. Saaup-saup la ring pengari ila ring karelang maragul nang anak king pamanisis. Malyaring ayari da iti king patingapun o nung maragul ya ing bale at ditak la mu reng misaup-saup mekad miras lang adwa o atlunng aldo.
Ngening alus simyentu no reng bale mekalingwan na ing antitang sadyang gawi ding minunang kabalen Kapampangan.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.