Lapu gipaubos sa 'state of emergency'

Sugod kagahapon, Disyembre 20, gipa-ubos sa state of emergency ang dakbayan sa Lapu-Lapu human opisyal nga mideklarar si Mayor Junard Chan.

Samtang, mibahad ang mayor sa mga mapahimuslanong negosyante nga mopaumento sa presyo sa basic needs sama sa gasolina, tubig imnunon ug pagkaon nga hayan bakwion ang business permit dungan sa pagpasira sa ilang negosyo.

Tungod sa grabeng kadaot nga gibilin sa Super Typhoon Odette niadtong Disyembre 16, una nang gideklarar nga ‘state of calamity’ ang Lapu-Lapu nga gipatuman niadtong Disyembre 18.

Gibana-bana nga 80,000 ka mga pamilya sa Olango Island ug mainland Lapu-Lapu ang napurwesyo sa maong katalagman ilabi na niadtong nabanlas ug nangaguba ang mga balay.

Laing suliran nga naabot sa buhatan ni Chan mao ang kinawatay sa mga kable, electrical wirings, trasformer ug uban pa nga gikan sa natumba nga poste sa Mactan Electric Company (MECO) ang gipangkawat, ilabi na nga 60 porsiyento sa electric facility sa Meco ang nangadaot.

Nakahukom si Chan nga ipa-ubos ang siyudad sa ‘state of emergency’ gumikan sa maong sitwasyon.

Bag-ong oras sa curfew ang gipatuman gikan sa alas 9 sa gabii hangtod sa alas 3 sa kaadlawon.

Mga nag-operate og junkshop ang gipasidan-an nga dili mopalit sa mga bronse gikan sa electric wires, ug binaligya nga transformer aron di mapagan ang ilang negosyo.

Kapulisan ipakatap sa nagkadaiyang mga dapit sa dakbayan nga mosusi kalabot sa gipatuman nga kamanduan sa mayor.

CALAMITY FUND

Gihangyo ni Mayor Chan ang mga sakop sa Konseho nga katugotan nga kadtong ubang pundo sa Siyudad nga wa magamit, ibutang ngadto sa calamity fund.

Sama nalang sa P104 milyones nga pundo alang sa pagpamalit sa bakuna nga mabalhin ngadto sa calamity fund.

Bana-bana ni Chan nga nagkinahanglan ang Siyudad og P300 milyones nga pundo aron pagtubag sa panginahanglan resulta sa mi-igo nga kalamidad.

Apan wa masabti sa mayor nga sa gipatawag kagahapon nga special session, lahi nga mga agenda ang gihisgutan sa Konseho.

“Ang importante karon ang siyagit sa mga tawo nga nangayo og tabang, mao na ang atong priority. “It’s not important to discuss the amendments of internal rules.

The realignment of MRDP (Mactan North Reclamation and Development Project) is that an urgency to called up a special session?,” kuwestiyon ni Chan atol sa press conference.

BILYONES ANG KADAOT

Moabot ngadto sa siyam ang gikatahong namatay sa bagyo samtang 12 ka tawo ang missing.

Gihulagway ni Mayor Chan nga 100 porsento ang damage sa Isla sa Olango.

Mga sakayan sa panagat, island hopping, transportasyon nga mobiyahe sa mainland paingon sa isla ang nangagusbat.

Mga kabalayan nagusbat, government facility naguba ang uban wa nay atop.

“Mora gyud og ground zero ang isla,” paghulagway ni Chan.

Pantalan sa Angasil, Barangay Mactan ug Engaño wharf ang nalumpag hinungdan nga dili na makapaduol ang pumpboat og gikinahanglan nga molusong sa dagat ang mga pasahero una makasaka sa pantalan o sa nagpaabot nga pumpboat.

Gibana-bana nga mokabat sa bilyon ang danyos sa maong bagyo sa tibuok dakbayan lakip na sa economic zone buildings ang giwatastas ni Odette.

Dili makahatag og tukmang tubag o pagbana-bana si Chan kon kanus-a makabalik sa normal ang Lapu-Lapu tungod sa kalapad sa danyos.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph