Gikuwestiyon ni Lapu-Lapu City Mayor Junard Chan nga wa magkadimao ang pagbahig sa P236 milyones nga calamity fund sa Siyudad ngadto sa apektadong barangay sa Super Typhoon Odette.
Gi-aprobahan na sa mga sakop sa Konseho atol sa gipahigayon nga special session niadtong Disyembre 20 ang paggahin og P236 milyones nga calamity fund.
Wa maka-uyon si Chan sa gihimo sa Konseho dihang ang pagbahin sa maong kantidad gibase sa gidaghanon sa household sa usa ka barangay.
“I can’t understand that there are some barangays that are very very small for example Caohagan (islet barangay) with 172 household and they allocated P5 million. So, P5 million divided by 172 moabot na sila og tag-P28,000 matag bubong. My question is, fair ba na siya, samtang ang uban tag-P5,000 ra,?” kuwestiyon ni Chan.
Si Konsehal Michael Dignos mipasabot nga ang pagbahin-bahin sa kantidad ilang gibase sa gidaghanon sa residente ug ang gi-grabehon sa danyos nga nahi-aguman sa matag barangay ilabi na ang isla sa Olango.
Laing barangay nga gikahibudngan sa mayor mao ang Barangay Bankal nga gigahinan og P10 milyones itandi sa Barangay Pusok, Pajo ug Gun-ob nga gamay ra ang madawat bisan pa man nga mas dako nga barangay itandi sa na-una.
Nagduda ang mayor nga adunay bolok pamolitika ang gihimo sa konseho.
“Dili nalang unta tagaan sa executive department og intriga, kay the distribution was approved in mass motion,Bay. Then sila mismo ang executive wala pa gyud matugkad ang kagrabe sa kada- barangay kay naa man areas di pa ma-agian,” reaksiyon ni Dignos.
WAY LABOT
Gipahibawo sab ni Mayor Chan nga wa hatagi og katungod sa konseho ang City Social Welfare and Development Office (CSWDO).
“Sulti nila nga gamiton kuno sa pamolitika mao na nga ang ilang (konseho) gusto di na moagi sa CSWDO ila nalang ipahatag sa barangay,” matod pa ni Chan atol sa pakighinabi sa mga tigbalita.
Mipasabot ang opisyal nga mas bintaha nga ang CSWDO maoy tahasan sa maong distribution tungod kay sila maoy nasayod sa mga residente nga tinuoray nga apektado inabagan sa barangay opisyal ug urban poor.
“Madugay man og sa CSWDO pa kay kuwang sila sa resources to handle the work as fast as we wanted to. And also the different barangays sila man jud kahibaw og unsa nahitabo sa ilahang isig ka area or jurisdiction,” pasabot ni Atty. Dignos.
Dugang pa ni Chan nga sa Huwebes, Disyembre 23 mopatawag siya og special session aron tuki-on ang Annual Investment Plan (AIP) aron nga hingpit nga ma-release ang P236M nga pundo ngadto sa nagkadaiyang barangay.