NAKURAT ang mga residente sa dapit dihang napalgan ang bag-ong himugso nga bata nga gisulod og silopin samtang gibitay sa punoan sa nangka didto sa Bankerohan Norte, Montevista, Davao de Oro alas 11 sa gabii, niadtong Martes, Disyembre 21, 2021.

Usa sa mga residente sa dapit ang matud pa nakakaplag sa maong masuso nga gibitay sa punoan diin naa pay pusod.

Gibutyag nga gilayong nanawag og tabang ang maong residente ug gipahibalo ngadto sa mga opisyal sa barangay ang nakit-an.

Nasayran nga usa ka lalaki ang maong bata kinsa perte kahimsog.

Sa post sa social media, mibaha ang mga komento nga mipaabot og kalooy ngadto sa napalgang bata nga giabandona sa mismo niyang inahan.

Sa paghagpat ning maong balita, ang maong bata na-turnover na ngadto sa opisina sa Municipal Social Welfare and Development Office.