Inig hagtok sa taknaan karong tungang gabii, ato na usab nga sugaton ang Pasko nga mao ang adlaw’ng natawhan sa atong giilang Manunubos nga si Hesu Kristo. Panahon unta karon sa kamaya, kalipay ug hudyaka. Pagminahalay ug paghinatagay ingon man panagdait. Apan na unta lang gumikan kay giigo man kita sa katalagman. Nahagba ug nalukapa kita karon human mihamag kanato ang super typhoon Odette nga naghatag og dakong kadaut. Dili basta-basta kining atong nahi-aguman gumikan sa dakong kadaut ug distroso.
Apan kini maghatag kanato usahay og leksiyon aron makapangandam kita sa umaabot nga mga adlaw kon aduna may susamang katalagman nga moabot. Pagpangandam ang importante aron kalikayan nga adunay kinabuhi nga makalas ug dakong danyos sa properdad ang atong mahi-aguman. Kay dili nato mapugngan ang mga kalamidad nga iya sa kinaiyahan. Apan gumikan sa insaktong pagpangandam dili kaayo moresulta og kadaut.
Hinuon, nakapangandam ang uban apan dili lang makaya ang lapad nga danyos nga atong nahiaguman. Sama sa pagpabakwit sa mga lumolupyo sa mga anaa maminuyo daplin sa dagat ug kasapaan. Ang landslide areas ug kadtong mga nadat-ugan sa mga dagkong punuan sa kahoy. Kay kinsa ba ang nagdahum nga mao kadto ang gikusgon sa hangin?
Wala kita magpaabot ining mao nga epekto. Putol ang elektrisidad, walay kuryente, walay tubig ug kuwang ang petroleum products. Taas ang linya sa mga water refilling stations, ATMs ug mga over the counter withdrawals. Bulawan ang tubig karon. Dinhi na kita makakuha og leksiyon nga kon walay kalamidad, atong lang usik-usikan ang atong mga pagkaon, tubig ug ubang mga batakang panginahanglan. Apan karon nga nagnihit na, wala na kitay ma-inum ug mahikap. Magsilbi nato kining leksiyon.
Gumikan ning atong mapait ug masakit nga kasinatian karon, ang uban kanato o halos kitang tanan nga naigo sa maong bagyo magsaulog sa ngitngit, ngi-ob ug dulom nga Pasko. Bleak Christmas, matod pa sa eninglis. Sakit man tuod apan pilit nato kining dawaton kay maoy gimbut-an sa Labaw’ng Makagagahum. Merry Christmas lang gihapon ninyong tanan. (bobbygnalzaro@gmail.com)