Ang Visayan Electric Co., mibana-bana sa hingpit nga pagpahiuli sa kuryente sa ilang franchise area sa kapin sa 400,000 ka kustomer nga makab-ot sa Enero 31, 2022.
Gitaho usab niini nga ang Cebu City ug Naga City maoy duha ka local government units nga nakaangkon og labing dakong kadaot sa Super Typhoon Odette.
Sa press briefing sa Dominggo, Disyembre 26, 2021, ang electric utility firm mitaho nga sa pagkakaron anaa sila sa 15.8 porsyento o 74,920.
Sa Disyembre 31, ilang gitarget nga ma-energize ang 30 porsyento o 142,255; sa Enero 10, 2022 sa 80 porsyento o 379,346; ug sa Enero 31, 2022, 100 porsyento o kinatibuk-ang gidaghanon sa mga kustomer sa 474,182.
“Kini maoy banabana kon kanus-a ta mahuman. Kini nga projection gibase sa workforce nga naa nato karon. Among giabaga ang ilang puy-anan, pagkaon, fuel, tubig ug uban pa tungod kay mitrabaho sila namo,” matod sa chief operating officer ug presidente sa Visayan Electric nga si Engr. Raul Lucero.
Sa pagkakaron, ang electric company adunay kinatibuk-ang manpower nga 725 ka personnel, 216 ang organic, 343 ang contractors, 166 ka distribution utilities gikan sa ilang sister company nga Davao Light, Manila Electric Company ug uban pa.
Matod ni Lucero, nangayo sila og pasensya ug pagsabot sa publiko tungod kay gihimo nila ang tanan nilang mahimo aron mapadali ang mga paningkamot nga mahiuli ang kuryente.
“Mas dali pang maghimo og bag-o kaysa mag-repair. Mao na usahay makaingon ko nga dili man gud ingon ana kadali. Lisod kaayo mohatag of specific date kay ang degree of damage dili pareha,” matod niya.
Ang Visayan Electric nagserbisyo sa mga dakbayan sa Sugbo, Mandaue, Talisay, Naga ug upat ka lungsod sa dakong bahin sa Metro Cebu - Liloan, Consolacion, Minglanilla ug San Fernando.
Adunay 12 ka crew nga nadestino sa Cebu City, lima sa Naga City, lima sa Liloan, usa ka crew sa Consolacion, pito ka crew sa Mandaue City, unom ka crew sa Talisay City, usa ka crew sa Minglanilla ug usa sa San Fernando.
Matod ni Lucero, ila usab nga gitinguha nga ma-reenergize ang tanang tambalanan sa Sugbo sa dili pa ang Bag-ong Tuig.
Ang kompanya naka-energize ug naka-restore sa 18 sa 19 ka substations.
Ang nag-inusarang substation nga wala pa ma-restore nahimutang sa Ayala area tungod sa dakong kadaot sa linya sa kuryente.
Ang Visayan Electric niingon nga aduna usab silay grace period o walay billing sugod sa Disyembre 17 hangtod sa Enero 31, 2022.
Ang mga konsumidor sa mga lugar nga mas sayo nga na-reenergized kinahanglan nga magpaabot nga mas dako nga bayranan kon itandi niadtong wa pay kuryente.
Alas 3 sa hapon, Disyembre 26, gipasiga sa Visayan Electric ang mosunod nga mga lugar duol sa vital installations sa dakbayan sa Sugbo sama sa mga bahin sa Natalio B. Bacalso Ave., mga bahin sa Don Jose Avila St., mga bahin sa UN Avenue, mga bahin sa Guadalajara ug mga bahin sa 234 Gervacio Quijada St.
Sa Dakbayan sa Mandaue, ilang gipasiga usab ang mga bahin sa P. Ouano Road hangtod sa Plaridel St. P. Ouano, Mandaue Causeway, mga bahin sa A.C Cortes Avenue ug mga bahin sa S. Jayme St. hangtod sa S.E. Llenes, Street.
Sa Consolacion, gipasiga usab sa Visayan Electric ang mga bahin sa Central Nautical Highway ug Laray Road,
Sa Talisay City, gipasiga usab niini ang mga bahin sa Rafael Rabaya Rd. samtang sa Minglanilla, bahin sa Cebu South Road ug Estaka ug mga bahin sa Cebu South Road ug Tres De Mayo.
Ang Visayan Electric naka-energize sa 74,920 gikan sa 474,182 ka apektadong kustomer, ug naka-restore og 251 o 46.1 porsiyento sa 544 ka linya sa kuryente, sulod sa franchise area niini niadtong Dominggo, Disyembre 26, 2021.