MITUGPA sa ospital ang usa ka pulis human naaksidente sa dalan gumikan sa saag nga iro didto sa Provincial Road sa Barangay Sto. Niño Kao, Nabunturan, Davao de Oro alas 10:05 sa buntag, niadtong Dominggo, Disyembre 26, 2021.
Ang biktima mao si Pat Jhon Phillip Cantere Coraje, 24, ulitawo, aktibong sakop sa Philippine National Police nga kasamtangang nadestino sa Maragusan Municipal Police Station ug molupyo sa Barangay Poblacion, Maragusan.
Base sa inisyal nga imbestigasyon, ang biktima sakay sa gimahenong Yamaha Mio MC nga dunay plaka nga MV File Number 1101-524998 nga nakarehistro ilawom sa pangalan ni Jasper Cabalida.
Nasayran nga niadtong higayona naglabigar sa dalan gikan sa Barangay Poblacion, Nabunturan padung sa Poblacion, Maragusan ang biktima apan, pag-abot sa dapit diin nahitabo ang insidente usa ka saag nga iro nga mitabok sa dalan diin gilikayan niya kini apan, nawad-an og kontrol sa gimanehong motorsiklo ang biktima hinungdan nga nabalintong sa sementadong kalsada.
Ang biktima nakahiagom og mga samad ug pangos sa nagkadaiyang parte sa iyang lawas ug gidali pagdala sa Davao de Oro Provincial Hospital sa lungsod sa Montevista sakay sa ambulansya sa Nabunturan Emergency Response Team aron siya matambalan.
Samtang ang motor nga gimaneho niini gikustodiya sa Nabunturan Municipal Police Station alang sa tukmang disposasyon.