LIBOAN ka mga balay sa lungsod sa Consolacion ang gigusbat sa bagyong Odette nga mihapak sa Sugbo sa gabii sa Disyembre 16, 2021.
Mokabat sa 24,000 ka mga balay ang giguba sa bagyo, diin 22,424 ang partially nga naguba samtang 1,527 ang hingpit nga nangaguba.
Hinuon, wa pa mohatag og balor sa kinatibuk-ang kadaut sa kabalayan si Engr. Danny Capangpangan, hepe sa Municipal Disaster Risk Reduction and Management Office.
Di lang kay sa mga balay lang nakadaut ang bagyong Odette, apil na usab sa agrikultura.
Si Cornelia Valle, hepe sa Municipal Agriculture Office, nibana-bana nga P8 milyunes ang danyos sa agrikultura tungod sa pagkaguba sa daghang mga poultry, piggery ug mga panagatan.
Gipaabot nga mosaka ang presyo sa mga karneng baboy, manok ug isda, apan ang Lungsod nag-monitor og maayo sa mga presyo aron way makapangabuso.
Bisan gani ang presyo sa tubig nga nagnihit og maayo gipa-monitor ni Mayor Joannes Alegado pinaagi sa Local Price Monitoring Council.
Ang Consolacion usa mga dapit sa Metro Cebu nga naigo og maayo sa bagyo.
Dunay mga bangka nga nangaguba samtang gidunggo sa mga baybayon ug usa ka tugboat ang nalunod sa Brgy. Tayud nga dunay sakay nga unom ka mga tripolante, apan duha pa lang ang nahaw-as sa Philippine Coast Guard (PCG).